Chapter 54

[English text for this chapter is available]

atha catuḥpañcāśattamo'dhyāyaḥ 10. || 54 ||
[Analyze grammar]

śrīśuka uvāca |
iti sarve susaṃrabdhā vāhānāruhya daṃśitāḥ |
svaiḥ svairbalaiḥ parikrāntā anvīyurdhṛtakārmukāḥ || 1 ||
[Analyze grammar]

tānāpatata ālokya yādavānīkayūthapāḥ |
tasthustatsammukhā rājanvisphūrjya svadhanūṃṣi te || 2 ||
[Analyze grammar]

aśvapṛṣṭhe gajaskandhe rathopasthe'stra kovidāḥ |
mumucuḥ śaravarṣāṇi meghā adriṣvapo yathā || 3 ||
[Analyze grammar]

patyurbalaṃ śarāsāraiśchannaṃ vīkṣya sumadhyamā |
savrīḍamaikṣattadvaktraṃ bhayavihvalalocanā || 4 ||
[Analyze grammar]

prahasya bhagavānāha mā sma bhairvāmalocane |
vinaṅkṣyatyadhunaivaitattāvakaiḥ śātravaṃ balam || 5 ||
[Analyze grammar]

teṣāṃ tadvikramaṃ vīrā gadasaṅkarṣaṇādayaḥ |
amṛṣyamāṇā nārācairjaghnurhayagajānrathān || 6 ||
[Analyze grammar]

petuḥ śirāṃsi rathināmaśvināṃ gajināṃ bhuvi |
sakuṇḍalakirīṭāni soṣṇīṣāṇi ca koṭiśaḥ || 7 ||
[Analyze grammar]

hastāḥ sāsigadeṣvāsāḥ karabhā ūravo'ṅghrayaḥ |
aśvāśvataranāgoṣṭra kharamartyaśirāṃsi ca || 8 ||
[Analyze grammar]

hanyamānabalānīkā vṛṣṇibhirjayakāṅkṣibhiḥ |
rājāno vimukhā jagmurjarāsandhapuraḥsarāḥ || 9 ||
[Analyze grammar]

śiśupālaṃ samabhyetya hṛtadāramivāturam |
naṣṭatviṣaṃ gatotsāhaṃ śuṣyadvadanamabruvan || 10 ||
[Analyze grammar]

bho bhoḥ puruṣaśārdūla daurmanasyamidaṃ tyaja |
na priyāpriyayo rājanniṣṭhā dehiṣu dṛśyate || 11 ||
[Analyze grammar]

yathā dārumayī yoṣitnṛtyate kuhakecchayā |
evamīśvaratantro'yamīhate sukhaduḥkhayoḥ || 12 ||
[Analyze grammar]

śaureḥ saptadaśāhaṃ vai saṃyugāni parājitaḥ |
trayoviṃśatibhiḥ sainyairjigye ekamahaṃ param || 13 ||
[Analyze grammar]

tathāpyahaṃ na śocāmi na prahṛṣyāmi karhicit |
kālena daivayuktena jānanvidrāvitaṃ jagat || 14 ||
[Analyze grammar]

adhunāpi vayaṃ sarve vīrayūthapayūthapāḥ |
parājitāḥ phalgutantrairyadubhiḥ kṛṣṇapālitaiḥ || 15 ||
[Analyze grammar]

ripavo jigyuradhunā kāla ātmānusāriṇi |
tadā vayaṃ vijeṣyāmo yadā kālaḥ pradakṣiṇaḥ || 16 ||
[Analyze grammar]

śrīśuka uvāca |
evaṃ prabodhito mitraiścaidyo'gātsānugaḥ puram |
hataśeṣāḥ punaste'pi yayuḥ svaṃ svaṃ puraṃ nṛpāḥ || 17 ||
[Analyze grammar]

rukmī tu rākṣasodvāhaṃ kṛṣṇadviḍasahansvasuḥ |
pṛṣṭhato'nvagamatkṛṣṇamakṣauhiṇyā vṛto balī || 18 ||
[Analyze grammar]

rukmyamarṣī susaṃrabdhaḥ śṛṇvatāṃ sarvabhūbhujām |
pratijajñe mahābāhurdaṃśitaḥ saśarāsanaḥ || 19 ||
[Analyze grammar]

ahatvā samare kṛṣṇamapratyūhya ca rukmiṇīm |
kuṇḍinaṃ na pravekṣyāmi satyametadbravīmi vaḥ || 20 ||
[Analyze grammar]

ityuktvā rathamāruhya sārathiṃ prāha satvaraḥ |
codayāśvānyataḥ kṛṣṇaḥ tasya me saṃyugaṃ bhavet || 21 ||
[Analyze grammar]

adyāhaṃ niśitairbāṇairgopālasya sudurmateḥ |
neṣye vīryamadaṃ yena svasā me prasabhaṃ hṛtā || 22 ||
[Analyze grammar]

vikatthamānaḥ kumatirīśvarasyāpramāṇavit |
rathenaikena govindaṃ tiṣṭha tiṣṭhetyathāhvayat || 23 ||
[Analyze grammar]

dhanurvikṛṣya sudṛḍhaṃ jaghne kṛṣṇaṃ tribhiḥ śaraiḥ |
āha cātra kṣaṇaṃ tiṣṭha yadūnāṃ kulapāṃsana || 24 ||
[Analyze grammar]

yatra yāsi svasāraṃ me muṣitvā dhvāṅkṣavaddhaviḥ |
hariṣye'dya madaṃ manda māyinaḥ kūṭayodhinaḥ || 25 ||
[Analyze grammar]

yāvanna me hato bāṇaiḥ śayīthā muñca dārikām |
smayankṛṣṇo dhanuśchittvā ṣaḍbhirvivyādha rukmiṇam || 26 ||
[Analyze grammar]

aṣṭabhiścaturo vāhāndvābhyāṃ sūtaṃ dhvajaṃ tribhiḥ |
sa cānyaddhanurādhāya kṛṣṇaṃ vivyādha pañcabhiḥ || 27 ||
[Analyze grammar]

taistāditaḥ śaraughaistu ciccheda dhanuracyutaḥ |
punaranyadupādatta tadapyacchinadavyayaḥ || 28 ||
[Analyze grammar]

parighaṃ paṭṭiśaṃ śūlaṃ carmāsī śaktitomarau |
yadyadāyudhamādatta tatsarvaṃ so'cchinaddhariḥ || 29 ||
[Analyze grammar]

tato rathādavaplutya khaḍgapāṇirjighāṃsayā |
kṛṣṇamabhyadravatkruddhaḥ pataṅga iva pāvakam || 30 ||
[Analyze grammar]

tasya cāpatataḥ khaḍgaṃ tilaśaścarma ceṣubhiḥ |
chittvāsimādade tigmaṃ rukmiṇaṃ hantumudyataḥ || 31 ||
[Analyze grammar]

dṛṣṭvā bhrātṛvadhodyogaṃ rukmiṇī bhayavihvalā |
patitvā pādayorbharturuvāca karuṇaṃ satī || 32 ||
[Analyze grammar]

śrīrukmiṇyuvāca |
yogeśvarāprameyātmandevadeva jagatpate |
hantuṃ nārhasi kalyāṇa bhrātaraṃ me mahābhuja || 33 ||
[Analyze grammar]

śrīśuka uvāca |
tayā paritrāsavikampitāṅgayā śucāvaśuṣyanmukharuddhakaṇṭhayā |
kātaryavisraṃsitahemamālayā gṛhītapādaḥ karuṇo nyavartata || 34 ||
[Analyze grammar]

cailena baddhvā tamasādhukāriṇaṃ saśmaśrukeśaṃ pravapanvyarūpayat |
tāvanmamarduḥ parasainyamadbhutaṃ yadupravīrā nalinīṃ yathā gajāḥ || 35 ||
[Analyze grammar]

kṛṣṇāntikamupavrajya dadṛśustatra rukmiṇam |
tathābhūtaṃ hataprāyaṃ dṛṣṭvā saṅkarṣaṇo vibhuḥ |
vimucya baddhaṃ karuṇo bhagavānkṛṣṇamabravīt || 36 ||
[Analyze grammar]

asādhvidaṃ tvayā kṛṣṇa kṛtamasmajjugupsitam |
vapanaṃ śmaśrukeśānāṃ vairūpyaṃ suhṛdo vadhaḥ || 37 ||
[Analyze grammar]

maivāsmānsādhvyasūyethā bhrāturvairūpyacintayā |
sukhaduḥkhado na cānyo'sti yataḥ svakṛtabhukpumān || 38 ||
[Analyze grammar]

bandhurvadhārhadoṣo'pi na bandhorvadhamarhati |
tyājyaḥ svenaiva doṣeṇa hataḥ kiṃ hanyate punaḥ || 39 ||
[Analyze grammar]

kṣatriyāṇāmayaṃ dharmaḥ prajāpativinirmitaḥ |
bhrātāpi bhrātaraṃ hanyādyena ghoratamastataḥ || 40 ||
[Analyze grammar]

rājyasya bhūmervittasya striyo mānasya tejasaḥ |
mānino'nyasya vā hetoḥ śrīmadāndhāḥ kṣipanti hi || 41 ||
[Analyze grammar]

taveyaṃ viṣamā buddhiḥ sarvabhūteṣu durhṛdām |
yanmanyase sadābhadraṃ suhṛdāṃ bhadramajñavat || 42 ||
[Analyze grammar]

ātmamoho nṛṇāmeva kalpate devamāyayā |
suhṛddurhṛdudāsīna iti dehātmamāninām || 43 ||
[Analyze grammar]

eka eva paro hyātmā sarveṣāmapi dehinām |
nāneva gṛhyate mūḍhairyathā jyotiryathā nabhaḥ || 44 ||
[Analyze grammar]

deha ādyantavāneṣa dravyaprāṇaguṇātmakaḥ |
ātmanyavidyayā kḷptaḥ saṃsārayati dehinam || 45 ||
[Analyze grammar]

nātmano'nyena saṃyogo viyogaśca sataḥ sati |
taddhetutvāttatprasiddherdṛgrūpābhyāṃ yathā raveḥ || 46 ||
[Analyze grammar]

janmādayastu dehasya vikriyā nātmanaḥ kvacit |
kalānāmiva naivendormṛtirhyasya kuhūriva || 47 ||
[Analyze grammar]

yathā śayāna ātmānaṃ viṣayānphalameva ca |
anubhuṅkte'pyasatyarthe tathāpnotyabudho bhavam || 48 ||
[Analyze grammar]

tasmādajñānajaṃ śokamātmaśoṣavimohanam |
tattvajñānena nirhṛtya svasthā bhava śucismite || 49 ||
[Analyze grammar]

śrīśuka uvāca |
evaṃ bhagavatā tanvī rāmeṇa pratibodhitā |
vaimanasyaṃ parityajya mano buddhyā samādadhe || 50 ||
[Analyze grammar]

prāṇāvaśeṣa utsṛṣṭo dviḍbhirhatabalaprabhaḥ |
smaranvirūpakaraṇaṃ vitathātmamanorathaḥ || 51 ||
[Analyze grammar]

cakre bhojakaṭaṃ nāma nivāsāya mahatpuram |
ahatvā durmatiṃ kṛṣṇamapratyūhya yavīyasīm || 52 ||
[Analyze grammar]

kuṇḍinaṃ na pravekṣyāmītyuktvā tatrāvasadruṣā |
bhagavānbhīṣmakasutāmevaṃ nirjitya bhūmipān || 53 ||
[Analyze grammar]

puramānīya vidhivadupayeme kurūdvaha |
tadā mahotsavo nṝṇāṃ yadupuryāṃ gṛhe gṛhe |
abhūdananyabhāvānāṃ kṛṣṇe yadupatau nṛpa || 54 ||
[Analyze grammar]

narā nāryaśca muditāḥ pramṛṣṭamaṇikuṇḍalāḥ |
pāribarhamupājahrurvarayościtravāsasoḥ || 55 ||
[Analyze grammar]

sā vṛṣṇipuryuttambhitendra ketubhir |
vicitramālyāmbararatnatoraṇaiḥ |
babhau pratidvāryupakḷptamaṅgalair |
āpūrṇakumbhāgurudhūpadīpakaiḥ || 56 ||
[Analyze grammar]

siktamārgā madacyudbhirāhūtapreṣṭhabhūbhujām |
gajairdvāḥsu parāmṛṣṭa rambhāpūgopaśobhitā || 57 ||
[Analyze grammar]

kurusṛñjayakaikeya vidarbhayadukuntayaḥ |
mitho mumudire tasminsambhramātparidhāvatām || 58 ||
[Analyze grammar]

rukmiṇyā haraṇaṃ śrutvā gīyamānaṃ tatastataḥ |
rājāno rājakanyāśca babhūvurbhṛśavismitāḥ || 59 ||
[Analyze grammar]

dvārakāyāmabhūdrājanmahāmodaḥ puraukasām |
rukmiṇyā ramayopetaṃ dṛṣṭvā kṛṣṇaṃ śriyaḥ patim || 60 ||
[Analyze grammar]