Chapter 37

[English text for this chapter is available]

keśivadhaḥ nāradakṛtaṃ bhagavatastavanaṃ nilāyana krīḍāyāṃ vyomāsuravadhaśca |
śrīśuka uvāca |
keśī tu kaṃsaprahitaḥ khurairmahīṃ |
mahāhayo nirjarayanmanojavaḥ |
saṭāvadhūtābhravimānasaṅkulaṃ |
kurvannabho heṣitabhīṣitākhilaḥ || 1 ||
[Analyze grammar]

viśālanetro vikaṭāsyakoṭaro |
bṛhadgalo nīlamahāmbudopamaḥ |
durāśayaḥ kaṃsahitaṃ cikīrṣuḥ |
vrajaṃ sa namdasya jagāma kampayan || 2 ||
[Analyze grammar]

taṃ trāsayantaṃ bhagavān svagokulaṃ |
taddheṣitairvālavighūrṇitāmbudam |
ātmānamājau mṛgayantamagraṇīḥ |
upāhvayat sa vyanadan mṛgendravat || 3 ||
[Analyze grammar]

sa taṃ niśāmyābhimukho makhena khaṃ |
pibannivābhyadravadatyamarṣaṇaḥ |
jaghāna pad‍bhyāmaravindalocanaṃ |
durāsadaścaṇḍajavo duratyayaḥ || 4 ||
[Analyze grammar]

tad vañcayitvā tamadhokṣajo ruṣā |
pragṛhya dorbhyāṃ parividhya pādayoḥ |
sāvajñamutsṛjya dhanuḥśatāntare |
yathoragaṃ tārkṣyasuto vyavasthitaḥ || 5 ||
[Analyze grammar]

saḥ labdhasaṃjñaḥ punarutthito ruṣā |
vyādāya keśī tarasā'pataddharim |
so'pyasya vaktre bhujamuttaraṃ smayan |
praveśayāmāsa yathoragaṃ bile || 6 ||
[Analyze grammar]

dantā nipeturbhagavad‍bhujaspṛśaḥ |
te keśinastaptamayaspṛśo yathā |
bāhuśca taddehagato mahātmano |
yathā'mayaḥ saṃvavṛdhe upekṣitaḥ || 7 ||
[Analyze grammar]

samedhamānena sa kṛṣṇabāhunā |
niruddhavāyuścaraṇāṃśca vikṣipan |
prasvinnagātraḥ parivṛttalocanaḥ |
papāta leṇḍaṃ visṛjan kṣitau vyasuḥ || 8 ||
[Analyze grammar]

taddehataḥ karkaṭikāphalopamād |
vyasorapākṛṣya bhujaṃ mahābhujaḥ |
avismito'yat‍nahatārirutsmayaiḥ |
prasūnavarṣairdiviṣadbhirīḍitaḥ || 9 ||
[Analyze grammar]

devarṣirupasaṅgamya bhāgavatapravaro nṛpa |
kṛṣṇamakliṣṭakarmāṇaṃ rahasyetadabhāṣata || 10 ||
[Analyze grammar]

kṛṣṇa kṛṣṇāprameyātman yogeśa jagadīśvara |
vāsudevākhilāvāsa sātvatāṃ pravara prabho || 11 ||
[Analyze grammar]

tvamātmā sarvabhūtānāṃ eko jyotirivaidhasām |
gūḍho guhāśayaḥ sākṣī mahāpuruṣa īśvaraḥ || 12 ||
[Analyze grammar]

ātmanā'tmāśrayaḥ pūrvaṃ māyayā sasṛje guṇān |
tairidaṃ satyasaṅkalpaḥ sṛjasyatsyavasīśvaraḥ || 13 ||
[Analyze grammar]

sa tvaṃ bhūdharabhūtānāṃ daityapramatharakṣasām |
avatīrṇo vināśāya sādhunāṃ rakṣaṇāya ca || 14 ||
[Analyze grammar]

diṣṭyā te nihato daityo līlayāyaṃ hayākṛtiḥ |
yasya heṣitasantrastāḥ tyajantyanimiṣā divam || 15 ||
[Analyze grammar]

cāṇūraṃ muṣṭikaṃ caiva mallānanyāṃśca hastinam |
kaṃsaṃ ca nihataṃ drakṣye paraśvo'hani te vibho || 16 ||
[Analyze grammar]

tasyānu śaṅkhayavana murāṇāṃ narakasya ca |
pārijātāpaharaṇaṃ indrasya ca parājayam || 17 ||
[Analyze grammar]

udvāhaṃ vīrakanyānāṃ vīryaśulkādilakṣaṇam |
nṛgasya mokṣaṇaṃ śāpād dvārakāyāṃ jagatpate || 18 ||
[Analyze grammar]

syamantakasya ca maṇeḥ ādānaṃ saha bhāryayā |
mṛtaputrapradānaṃ ca brāhmaṇasya svadhāmataḥ || 19 ||
[Analyze grammar]

pauṇḍrakasya vadhaṃ paścāt kāśipuryāśca dīpanam |
dantavakrasya nidhanaṃ caidyasya ca mahākratau || 20 ||
[Analyze grammar]

yāni cānyāni vīryāṇi dvārakāmāvasan bhavān |
kartā drakṣyāmyahaṃ tāni geyāni kavibhirbhuvi || 21 ||
[Analyze grammar]

atha te kālarūpasya kṣapayiṣṇoramuṣya vai |
akṣauhiṇīnāṃ nidhanaṃ drakṣyāmyarjunasāratheḥ || 22 ||
[Analyze grammar]

viśuddhavijñānaghanaṃ svasaṃsthayā |
samāptasarvārthamamoghavāñchitam |
svatejasā nityanivṛttamāyā |
guṇapravāhaṃ bhagavantamīmahi || 23 ||
[Analyze grammar]

tvāmīśvaraṃ svāśrayamātmamāyayā |
vinirmitāśeṣaviśeṣakalpanam |
krīḍārthamadyāttamanuṣyavigrahaṃ |
nato'smi dhuryaṃ yaduvṛṣṇisātvatām || 24 ||
[Analyze grammar]

śrīśuka uvāca |
evaṃ yadupatiṃ kṛṣṇaṃ bhāgavatapravaro muniḥ |
praṇipatyābhyanujñāto yayau taddarśanotsavaḥ || 25 ||
[Analyze grammar]

bhagavānapi govindo hatvā keśinamāhave |
paśūnapālayat pālaiḥ prītairvrajasukhāvahaḥ || 26 ||
[Analyze grammar]

ekadā te paśūn pālāḥn cārayanto'drisānuṣu |
cakrurnilāyanakrīḍāḥ corapālāpadeśataḥ || 27 ||
[Analyze grammar]

tatrāsankaticiccorāḥ pālāśca katicinnṛpa |
meṣāyitāśca tatraike vijahrurakutobhayāḥ || 28 ||
[Analyze grammar]

mayaputro mahāmāyo vyomo gopālaveṣadhṛk |
meṣāyitānapovāha prāyaścorāyito bahūn || 29 ||
[Analyze grammar]

giridaryāṃ vinikṣipya nītaṃ nītaṃ mahāsuraḥ |
śilayā pidadhe dvāraṃ catuḥpañcāvaśeṣitāḥ || 30 ||
[Analyze grammar]

tasya tatkarma vijñāya kṛṣṇaḥ śaraṇadaḥ satām |
gopān nayantaṃ jagrāha vṛkaṃ haririvaujasā || 31 ||
[Analyze grammar]

sa nijaṃ rūpamāsthāya girīndrasadṛśaṃ balī |
icchan vimoktumātmānaṃ nāśaknod grahaṇāturaḥ || 32 ||
[Analyze grammar]

taṃ nigṛhyācyuto dorbhyāṃ pātayitvā mahītale |
paśyatāṃ divi devānāṃ paśumāramamārayat || 33 ||
[Analyze grammar]

guhāpidhānaṃ nirbhidya gopān niḥsārya kṛcchrataḥ |
stūyamānaḥ surairgopaiḥ praviveśa svagokulam || 34 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe vyomāsuravadho nāma saptatriṃśo'dhyāyaḥ || 37 ||
[Analyze grammar]