Chapter 21

[English text for this chapter is available]

veṇugītambhagavato madhuraṃ |
veṇunādaṃ ākarṇya gopībhiḥ tadguṇagānam |
śrīśuka uvāca |
itthaṃ śarat svacchajalaṃ padmākarasugandhinā |
nyaviśad vāyunā vātaṃ sa gogopālako'cyutaḥ || 1 ||
[Analyze grammar]

kusumitavanarājiśuṣmibhṛṅga |
dvijakulaghuṣṭasaraḥsarinmahīdhram |
madhupatiravagāhya cārayan gāḥ |
sahapaśupālabalaścukūja veṇum || 2 ||
[Analyze grammar]

tad vrajastriya āśrutya veṇugītaṃ smarodayam |
kāścit parokṣaṃ kṛṣṇasya svasakhībhyo'nvavarṇayan || 3 ||
[Analyze grammar]

tad varṇayitumārabdhāḥ smarantyaḥ kṛṣṇaceṣṭitam |
nāśakan smaravegena vikṣiptamanaso nṛpa || 4 ||
[Analyze grammar]

barhāpīḍaṃ naṭavaravapuḥ karṇayoḥ karṇikāraṃ |
bibhrad vāsaḥ kanakakapiśaṃ vaijayantīṃ ca mālām |
randhrān veṇoradharasudhayāpūrayan gopavṛndaiḥ |
vṛndāraṇyaṃ svapadaramaṇaṃ prāviśad gītakīrtiḥ || 5 ||
[Analyze grammar]

iti veṇuravaṃ rājan sarvabhūtamanoharam |
śrutvā vrajastriyaḥ sarvā varṇayantyo'bhirebhire || 6 ||
[Analyze grammar]

śrīgopya ūcuḥ |
akṣaṇvatāṃ phalamidaṃ na paraṃ vidāmaḥ |
sakhyaḥ paśūnanu viveśayatorvayasyaiḥ |
vaktraṃ vrajeśasutayoranaveṇujuṣṭaṃ |
yairvā nipītamanuraktakaṭākṣamokṣam || 7 ||
[Analyze grammar]

cūtapravālabarhastabak utpalābja |
mālānupṛktaparidhāna vicitraveśau |
madhye virejaturalaṃ paśupālagoṣṭhyāṃ |
raṅge yathā naṭavarau kva ca gāyamānau || 8 ||
[Analyze grammar]

gopyaḥ kimācaradayaṃ kuśalaṃ sma veṇuḥ |
dāmodarādharasudhāmapi gopikānām |
bhuṅkte svayaṃ yadavaśiṣṭarasaṃ hradinyo |
hṛṣyattvaco'śru mumucustaravo yathā'ryāḥ || 9 ||
[Analyze grammar]

vṛndāvanaṃ sakhi bhuvo vitanoti kīrtiṃ |
yad devakīsutapadāmbu jalabdhalakṣmi |
govindaveṇumanu mattamayūranṛtyaṃ |
prekṣyādrisānvavaratānyasamastasattvam || 10 ||
[Analyze grammar]

dhanyāḥ sma mūḍhamatayo'pi hariṇya etā |
yā nandanandanamupātta vicitraveśam |
ākarṇya veṇuraṇitaṃ sahakṛṣṇasārāḥ |
pūjāṃ dadhurviracitāṃ praṇayāvalokaiḥ || 11 ||
[Analyze grammar]

kṛṣṇaṃ nirīkṣya vanitotsavarūpaśīlaṃ |
śrutvā ca tatkvaṇitaveṇu viviktagītam |
devyo vimānagatayaḥ smaranunnasārā |
bhraśyat prasūnakabarā mumuhurvinīvyaḥ || 12 ||
[Analyze grammar]

gāvaśca kṛṣṇamukhanirgataveṇugīta |
pīyūṣamuttabhitakarṇapuṭaiḥ pibantyaḥ |
śāvāḥ snutastanapayaḥkavalāḥ sma tasthuḥ |
govindamātmani dṛśāśrukalāḥ spṛśantyaḥ || 13 ||
[Analyze grammar]

prāyo batāmba vihagā munayo vane'smin |
kṛṣṇekṣitaṃ taduditaṃ kalaveṇugītam |
āruhya ye drumabhujān rucirapravālān |
śrṛṇvatyamīlitadṛśo vigatānyavācaḥ || 14 ||
[Analyze grammar]

nadyastadā tadupadhārya mukundagītam |
āvartalakṣita manobhavabhagnavegāḥ |
āliṅganasthagitamūrmibhujairmurāreḥ |
gṛhṇanti pādayugalaṃ kamalopahārāḥ || 15 ||
[Analyze grammar]

dṛṣṭvā'tape vrajapaśūn saha rāmagopaiḥ |
sañcārayantamanu veṇumudīrayantam |
premapravṛddha uditaḥ kusumāvalībhiḥ |
sakhyurvyadhāt svavapuṣāmbuda ātapatram || 16 ||
[Analyze grammar]

pūrṇāḥ pulindya urugāyapadābjarāga |
śrīkuṅkumena dayitāstanamaṇḍitena |
taddarśanasmararujastṛṇarūṣitena |
limpantya ānanakuceṣu jahustadādhim || 17 ||
[Analyze grammar]

hantāyamadrirabalā haridāsavaryo |
yad rāmakṛṣṇacaraṇasparaśapramodaḥ |
mānaṃ tanoti sahagogaṇayostayoryat |
pānīyasūyavasa kandarakandamūlaiḥ || 18 ||
[Analyze grammar]

gā gopakairanuvanaṃ nayatorudāra |
veṇusvanaiḥ kalapadaistanubhṛtsu sakhyaḥ |
aspandanaṃ gatimatāṃ pulakastaruṇāṃ |
niryogapāśakṛta lakṣaṇayorvicitram || 19 ||
[Analyze grammar]

evaṃvidhā bhagavato yā vṛndāvanacāriṇaḥ |
varṇayantyo mitho gopyaḥ krīḍāstanmayatāṃ yayuḥ || 20 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe ekaviṃśo'dhyāyaḥ || 21 ||
[Analyze grammar]