Chapter 11

[English text for this chapter is available]

gopānāṃ gokulaṃ parityajya vṛndāvane gamanaṃ tatra |
śrīkṛṣṇadvārāvatsāsurabakāsurayorvadhaḥ |
śrīśuka uvāca |
gopā nandādayaḥ śrutvā drumayoḥ patato ravam |
tatrājagmuḥ kuruśreṣṭha nirghātabhayaśaṅkitāḥ || 1 ||
[Analyze grammar]

bhūmyāṃ nipatitau tatra dadṛśuryamalārjunau |
babhramustadavijñāya lakṣyaṃ patanakāraṇam || 2 ||
[Analyze grammar]

ulūkhalaṃ vikarṣantaṃ dāmnā baddhaṃ ca bālakam |
kasyedaṃ kuta āścaryaṃ utpāta iti kātarāḥ || 3 ||
[Analyze grammar]

bālā ūcuraneneti tiryaggataṃ ulūkhalam |
vikarṣatā madhyagena puruṣau api acakṣmahi || 4 ||
[Analyze grammar]

na te taduktaṃ jagṛhuḥ na ghaṭeteti tasya tat |
bālasyotpāṭanaṃ tarvoḥ kecit saṃdigdhacetasaḥ || 5 ||
[Analyze grammar]

ulūkhalaṃ vikarṣantaṃ dāmnā baddhaṃ svamātmajam |
vilokya nandaḥ prahasad vadano vimumoca ha || 6 ||
[Analyze grammar]

gopībhiḥ stobhito'nṛtyad bhagavān bālavat kvacit |
ud‍gāyati kvacinmugdhaḥ tadvaśo dāruyantravat || 7 ||
[Analyze grammar]

bibharti kvacidājñaptaḥ pīṭhakonmānapādukam |
bāhukṣepaṃ ca kurute svānāṃ ca prītimāvahan || 8 ||
[Analyze grammar]

darśayaṃstadvidāṃ loka ātmano bhṛtyavaśyatām |
vrajasyovāha vai harṣaṃ bhagavān bālaceṣṭitaiḥ || 9 ||
[Analyze grammar]

krīṇīhi bhoḥ phalānīti śrutvā satvaramacyutaḥ |
phalārthī dhānyamādāya yayau sarvaphalapradaḥ || 10 ||
[Analyze grammar]

phalavikrayiṇī tasya cyutadhānyakaradvayam |
phalairapūrayad rat‍naiḥ phalabhāṇḍamapūri ca |
sarittīragataṃ kṛṣṇaṃ bhagnārjunamathāhvayat |
rāmaṃ ca rohiṇī devī krīḍantaṃ bālakairbhṛśam || 12 ||
[Analyze grammar]

nopeyātāṃ yadā'hūtau krīḍāsaṅgena putrakau |
yaśodāṃ preṣayāmāsa rohiṇī putravatsalām || 13 ||
[Analyze grammar]

krīḍantaṃ sā sutaṃ bālaiḥ ativelaṃ sahāgrajam |
yaśodājohavīt kṛṣṇaṃ putrasnehasnutastanī || 14 ||
[Analyze grammar]

kṛṣṇa kṛṣṇāravindākṣa tāta ehi stanaṃ piba |
alaṃ vihāraiḥ kṣutkṣāntaḥ krīḍāśrānto'si putraka || 15 ||
[Analyze grammar]

he rāmāgaccha tātāśu sānujaḥ kulanandana |
prātareva kṛtāhāraḥ tad bhavān bhoktumarhati || 16 ||
[Analyze grammar]

pratīkṣate tvāṃ dāśārha bhokṣyamāṇo vrajādhipaḥ |
ehyāvayoḥ priyaṃ dhehi svagṛhān yāta bālakāḥ || 17 ||
[Analyze grammar]

dhūlidhūsaritāṅgastvaṃ putra majjanamāvaha |
janmarkṣamadya bhavato viprebhyo dehi gāḥ śuciḥ || 18 ||
[Analyze grammar]

paśya paśya vayasyāṃste mātṛmṛṣṭān svalaṅkṛtān |
tvaṃ ca snātaḥ kṛtāhāro viharasva svalaṅkṛtaḥ || 19 ||
[Analyze grammar]

itthaṃ yaśodā tamaśeṣaśekharaṃ |
matvā sutaṃ snehanibaddhadhīrnṛpa |
haste gṛhītvā saharāmamacyutaṃ |
nītvā svavāṭaṃ kṛtavatyathodayam || 20 ||
[Analyze grammar]

gopavṛddhā mahotpātān anubhūya bṛhadvane |
nandādayaḥ samāgamya vrajakāryaṃ amantrayan || 21 ||
[Analyze grammar]

tatra upanandanāmā'ha gopo jñānavayo'dhikaḥ |
deśakālārthatattvajñaḥ priyakṛd rāmakṛṣṇayoḥ || 22 ||
[Analyze grammar]

utthātavyaṃ ito'smābhiḥ gokulasya hitaiṣibhiḥ |
āyānti atra mahotpātā bālānāṃ nāśahetavaḥ || 23 ||
[Analyze grammar]

muktaḥ kathañcid rākṣasyā bālaghnyā bālako hyasau |
hareranugrahāt nūnaṃ anaścopari nāpatat || 24 ||
[Analyze grammar]

cakravātena nīto'yaṃ daityena vipadaṃ viyat |
śilāyāṃ patitastatra paritrātaḥ sureśvaraiḥ || 25 ||
[Analyze grammar]

yanna mriyeta drumayoḥ antaraṃ prāpya bālakaḥ |
asau anyatamo vāpi tadapyacyutarakṣaṇam || 26 ||
[Analyze grammar]

yāvat autpātiko'riṣṭo vrajaṃ nābhibhaveditaḥ |
tāvad bālānupādāya yāsyāmo'nyatra sānugāḥ || 27 ||
[Analyze grammar]

vanaṃ vṛndāvanaṃ nāma paśavyaṃ navakānanam |
gopagopīgavāṃ sevyaṃ puṇyādri tṛṇavīrudham || 28 ||
[Analyze grammar]

tattatrādyaiva yāsyāmaḥ śakaṭān yuṅkta mā ciram |
godhanānyagrato yāntu bhavatāṃ yadi rocate || 29 ||
[Analyze grammar]

tacchrutvaikadhiyo gopāḥ sādhu sādhviti vādinaḥ |
vrajān svān svān samāyujya yayū rūḍhaparicchadāḥ || 30 ||
[Analyze grammar]

vṛddhān bālān striyo rājan sarvopakaraṇāni ca |
anaḥsvāropya gopālā yattā āttaśarāsanāḥ || 31 ||
[Analyze grammar]

godhanāni puraskṛtya śṛṅgāṇyāpūrya sarvataḥ |
tūryaghoṣeṇa mahatā yayuḥ sahapurohitāḥ || 32 ||
[Analyze grammar]

gopyo rūḍharathā nūt‍na kucakuṃkuma kāntayaḥ |
kṛṣṇalīlā jaguḥ prītyā niṣkakaṇṭhyaḥ suvāsasaḥ || 33 ||
[Analyze grammar]

tathā yaśodārohiṇyau ekaṃ śakaṭamāsthite |
rejatuḥ kṛṣṇarāmābhyāṃ tatkathāśravaṇotsuke || 34 ||
[Analyze grammar]

vṛndāvanaṃ sampraviśya sarvakālasukhāvaham |
tatra cakrurvrajāvāsaṃ śakaṭaiḥ ardhacandravat || 35 ||
[Analyze grammar]

vṛndāvanaṃ govardhanaṃ yamunāpulināni ca |
vīkṣyāsīt uttamā prītī rāmamādhavayornṛpa || 36 ||
[Analyze grammar]

evaṃ vrajaukasāṃ prītiṃ yacchantau bālaceṣṭitaiḥ |
kalavākyaiḥ svakālena vatsapālau babhūvatuḥ || 37 ||
[Analyze grammar]

avidūre vrajabhuvaḥ saha gopāladārakaiḥ |
cārayāmāsatuḥ vatsān nānākrīḍāparicchadau || 38 ||
[Analyze grammar]

kvacid vādayato veṇuṃ kṣepaṇaiḥ kṣipataḥ kvacit |
kvacit pādaiḥ kiṅkiṇībhiḥ kvacit kṛtrimagovṛṣaiḥ || 39 ||
[Analyze grammar]

vṛṣāyamāṇau nardantau yuyudhāte parasparam |
anukṛtya rutairjantūn ceratuḥ prākṛtau yathā || 40 ||
[Analyze grammar]

kadācid yamunātīre vatsān cārayatoḥ svakaiḥ |
vayasyaiḥ kṛṣṇabalayoḥ jighāṃsurdaitya āgamat || 41 ||
[Analyze grammar]

taṃ vatsarūpiṇaṃ vīkṣya vatsayūthagataṃ hariḥ |
darśayan baladevāya śanairmugdha ivāsadat || 42 ||
[Analyze grammar]

gṛhītvā aparapādābhyāṃ sahalāṅgūlamacyutaḥ |
bhrāmayitvā kapitthāgre prāhiṇod gatajīvitam |
sa kapitthairmahākāyaḥ pātyamānaiḥ papāta ha || 43 ||
[Analyze grammar]

taṃ vīkṣya vismitā bālāḥ śaśaṃsuḥ sādhu sādhviti |
devāśca parisantuṣṭā babhūvuḥ puṣpavarṣiṇaḥ || 44 ||
[Analyze grammar]

tau vatsapālakau bhūtvā sarvalokaikapālakau |
saprātarāśau govatsān cārayantau viceratuḥ || 45 ||
[Analyze grammar]

svaṃ svaṃ vatsakulaṃ sarve pāyayiṣyanta ekadā |
gatvā jalāśayābhyāśaṃ pāyayitvā papurjalam || 46 ||
[Analyze grammar]

te tatra dadṛśurbālā mahāsattvamavasthitam |
tatrasurvajranirbhinnaṃ gireḥ śṛṅgamiva cyutam || 47 ||
[Analyze grammar]

sa vai bako nāma mahānasuro bakarūpadhṛk |
āgatya sahasā kṛṣṇaṃ tīkṣṇatuṇḍo'grasad‍balī || 48 ||
[Analyze grammar]

kṛṣṇaṃ mahābakagrastaṃ dṛṣṭvā rāmādayo'rbhakāḥ |
babhūvurindriyāṇīva vinā prāṇaṃ vicetasaḥ || 49 ||
[Analyze grammar]

taṃ tālumūlaṃ pradahantamagnivad |
gopālasūnuṃ pitaraṃ jagad‍guroḥ |
caccharda sadyo'tiruṣākṣataṃ bakaḥ |
tuṇḍena hantuṃ punarabhyapadyata || 50 ||
[Analyze grammar]

taṃ āpatantaṃ sa nigṛhya tuṇḍayoḥ |
dorbhyāṃ bakaṃ kaṃsasakhaṃ satāṃ patiḥ |
paśyatsu bāleṣu dadāra līlayā |
mudāvaho vīraṇavad divaukasām || 51 ||
[Analyze grammar]

tadā bakāriṃ suralokavāsinaḥ |
samākiran nandanamallikādibhiḥ |
samīḍire cānakaśaṅkhasaṃstavaiḥ |
tadvīkṣya gopālasutā visismire || 52 ||
[Analyze grammar]

muktaṃ bakāsyād upalabhya bālakā |
rāmādayaḥ prāṇamivendriyo gaṇaḥ |
sthānāgataṃ taṃ parirabhya nirvṛtāḥ |
praṇīya vatsān vrajametya tajjaguḥ || 53 ||
[Analyze grammar]

śrutvā tad vismitā gopā gopyaścātipriyādṛtāḥ |
pretya āgatamivotsukyād aikṣanta tṛṣitekṣaṇāḥ || 54 ||
[Analyze grammar]

aho batāsya bālasya bahavo mṛtyavo'bhavan |
apyāsīd vipriyaṃ teṣāṃ kṛtaṃ pūrvaṃ yato bhayam || 55 ||
[Analyze grammar]

athāpi abhibhavantyenaṃ naiva te ghoradarśanāḥ |
jighāṃsayainamāsādya naśyantyagnau pataṅgavat || 56 ||
[Analyze grammar]

aho brahmavidāṃ vāco nāsatyāḥ santi karhicit |
gargo yadāha bhagavān anvabhāvi tathaiva tat || 57 ||
[Analyze grammar]

iti nandādayo gopāḥ kṛṣṇarāmakathāṃ mudā |
kurvanto ramamāṇāśca nāvindan bhavavedanām || 58 ||
[Analyze grammar]

evaṃ vihāraiḥ kaumāraiḥ kaumāraṃ jahaturvraje |
nilāyanaiḥ setubandhaiḥ markaṭotplavanādibhiḥ || 59 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe ekādaśo'dhyāyaḥ || 11 ||
[Analyze grammar]