Chapter 16

[English text for this chapter is available]

jamadagnivadhaḥ paraśurāmadvārā kṣatriyāṇāṃ saṃhāraḥ viśvāmitra vaṃśavarṇanaṃ ca |
śrīśuka uvāca |
pitropaśikṣito rāmaḥ tatheti kurunandana |
saṃvatsaraṃ tīrthayātrāṃ caritvā'śramamāvrajat || 1 ||
[Analyze grammar]

kadācit reṇukā yātā gaṃgāyāṃ padmamālinam |
gandharvarājaṃ krīḍantaṃ apsarobhirapaśyata || 2 ||
[Analyze grammar]

vilokayantī krīḍantaṃ udakārthaṃ nadīṃ gatā |
homavelāṃ na sasmāra kiñcit citrarathaspṛhā || 3 ||
[Analyze grammar]

kālātyayaṃ taṃ vilokya muneḥ śāpaviśaṃkitā |
āgatya kalaśaṃ tasthau purodhāya kṛtāñjaliḥ || 4 ||
[Analyze grammar]

vyabhicāraṃ munirjñātvā pat‍nyāḥ prakupito'bravīt |
ghnataināṃ putrakāḥ pāpāṃ ityuktāste na cakrire || 5 ||
[Analyze grammar]

rāmaḥ sañcoditaḥ pitrā bhrātṝn mātrā sahāvadhīt |
prabhāvajño muneḥ samyak samādhestapasaśca saḥ || 6 ||
[Analyze grammar]

vareṇa cchandayāmāsa prītaḥ satyavatīsutaḥ |
vavre hatānāṃ rāmo'pi jīvitaṃ cāsmṛtiṃ vadhe || 7 ||
[Analyze grammar]

uttasthuste kuśalino nidrāpāya ivāñjasā |
piturvidvān tapovīryaṃ rāmaścakre suhṛdvadham || 8 ||
[Analyze grammar]

ye'rjunasya sutā rājan smarantaḥ svapiturvadham |
rāmavīryaparābhūtā lebhire śarma na kvacit || 9 ||
[Analyze grammar]

ekadāśramato rāme sabhrātari vanaṃ gate |
vairaṃ sisādhayiṣavo labdhacchidrā upāgaman || 10 ||
[Analyze grammar]

dṛṣṭvāgnyagāra āsīnaṃ āveśitadhiyaṃ munim |
bhagavati uttamaśloke jaghnuste pāpaniścayāḥ || 11 ||
[Analyze grammar]

yācyamānāḥ kṛpaṇayā rāmamātrātidāruṇāḥ |
prasahya śira utkṛtya ninyuste kṣatrabandhavaḥ || 12 ||
[Analyze grammar]

reṇukā duḥkhaśokārtā nighnantyātmānamātmanā |
rāma rāmeti tāteti vicukrośoccakaiḥ satī || 13 ||
[Analyze grammar]

tadupaśrutya dūrasthā hā rāmetyārtavatsvanam |
tvarayā'śramamāsādya dadṛśuḥ pitaraṃ hatam || 14 ||
[Analyze grammar]

te duḥkharoṣāmarṣārti śokavegavimohitāḥ |
hā tāta sādho dharmiṣṭha tyaktvāsmān svargato bhavān || 15 ||
[Analyze grammar]

vilapyaivaṃ piturdehaṃ nidhāya bhrātṛṣu svayam |
pragṛhya paraśuṃ rāmaḥ kṣatrāntāya mano dadhe || 16 ||
[Analyze grammar]

gatvā māhiṣmatīṃ rāmo brahmaghnavihataśriyam |
teṣāṃ sa śīrṣabhī rājan madhye cakre mahāgirim || 17 ||
[Analyze grammar]

tad raktena nadīṃ ghorāṃ abrahmaṇyabhayāvahām |
hetuṃ kṛtvā pitṛvadhaṃ kṣatre'maṃgalakāriṇi || 18 ||
[Analyze grammar]

triḥsaptakṛtvaḥ pṛthivīṃ kṛtvā niḥkṣatriyāṃ prabhuḥ |
samantapañcake cakre śoṇitodān hradān nṛpa || 19 ||
[Analyze grammar]

pituḥ kāyena sandhāya śira ādāya barhiṣi |
sarvadevamayaṃ devaṃ ātmānaṃ ayajanmakhaiḥ || 20 ||
[Analyze grammar]

dadau prācīṃ diśaṃ hotre brahmaṇe dakṣiṇāṃ diśam |
adhvaryave pratīcīṃ vai ud‍gātre uttarāṃ diśam || 21 ||
[Analyze grammar]

anyebhyo'vāntaradiśaḥ kaśyapāya ca madhyataḥ |
āryāvartaṃ upadraṣṭre sadasyebhyastataḥ param || 22 ||
[Analyze grammar]

tataścāvabhṛthasnāna vidhūtāśeṣakilbiṣaḥ |
sarasvatyāṃ mahānadyāṃ reje vyabhra ivāṃśumān || 23 ||
[Analyze grammar]

svadehaṃ jamadagnistu labdhvā saṃjñānalakṣaṇam |
ṛṣīṇāṃ maṇḍale so'bhūt saptamo rāmapūjitaḥ || 24 ||
[Analyze grammar]

jāmadagnyo'pi bhagavān rāmaḥ kamalalocanaḥ |
āgāminyantare rājan vartayiṣyati vai bṛhat || 25 ||
[Analyze grammar]

āste'dyāpi mahendrādrau nyastadaṇḍaḥ praśāntadhīḥ |
upagīyamānacaritaḥ siddhagandharvacāraṇaiḥ || 26 ||
[Analyze grammar]

evaṃ bhṛguṣu viśvātmā bhagavān harirīśvaraḥ |
avatīrya paraṃ bhāraṃ bhuvo'han bahuśo nṛpān || 27 ||
[Analyze grammar]

gādherabhūt mahātejāḥ samiddha iva pāvakaḥ |
tapasā kṣātramutsṛjya yo lebhe brahmavarcasam || 28 ||
[Analyze grammar]

viśvāmitrasya caivāsan putrā ekaśataṃ nṛpa |
madhyamastu madhucchandā madhucchandasa eva te || 29 ||
[Analyze grammar]

putraṃ kṛtvā śunaḥśepaṃ devarātaṃ ca bhārgavam |
ājīgartaṃ sutānāha jyeṣṭha eṣa prakalpyatām || 30 ||
[Analyze grammar]

yo vai hariścandramakhe vikrītaḥ puruṣaḥ paśuḥ |
stutvā devān prajeśādīn mumuce pāśabandhanāt || 31 ||
[Analyze grammar]

yo rāto devayajane devairgādhiṣu tāpasaḥ |
devarāta iti khyātaḥ śunaḥśepastu bhārgavaḥ || 32 ||
[Analyze grammar]

ye madhucchandaso jyeṣṭhāḥ kuśalaṃ menire na tat |
aśapat tān muniḥ kruddho mlecchā bhavata durjanāḥ || 33 ||
[Analyze grammar]

sa hovāca madhucchandāḥ sārdhaṃ pañcāśatā tataḥ |
yanno bhavān saṃjānīte tasmin tiṣṭhāmahe vayam || 34 ||
[Analyze grammar]

jyeṣṭhaṃ mantradṛśaṃ cakruḥ tvāṃ anvañco vayaṃ sma hi |
viśvāmitraḥ sutānāha vīravanto bhaviṣyatha |
ye mānaṃ me'nugṛhṇanto vīravantamakarta mām || 35 ||
[Analyze grammar]

eṣa vaḥ kuśikā vīro devarātastamanvita |
anye cāṣṭakahārīta jayakratumadādayaḥ || 36 ||
[Analyze grammar]

evaṃ kauśikagotraṃ tu viśvāmitraiḥ pṛthagvidham |
pravarāntaramāpannaṃ taddhi caivaṃ prakalpitam || 37 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ navamaskandhe ṣoḍaśo'dhyāyaḥ || 16 ||
[Analyze grammar]