Chapter 11

[English text for this chapter is available]

śrīśuka uvāca |
atho surāḥ pratyupalabdhacetasaḥ parasya puṃsaḥ parayānukampayā |
jaghnurbhṛśaṃ śakrasamīraṇādayastāṃstānraṇe yairabhisaṃhatāḥ purā || 1 ||
[Analyze grammar]

vairocanāya saṃrabdho bhagavānpākaśāsanaḥ |
udayacchadyadā vajraṃ prajā hā heti cukruśuḥ || 2 ||
[Analyze grammar]

vajrapāṇistamāhedaṃ tiraskṛtya puraḥsthitam |
manasvinaṃ susampannaṃ vicarantaṃ mahāmṛdhe || 3 ||
[Analyze grammar]

naṭavanmūḍha māyābhirmāyeśānno jigīṣasi |
jitvā bālānnibaddhākṣānnaṭo harati taddhanam || 4 ||
[Analyze grammar]

ārurukṣanti māyābhirutsisṛpsanti ye divam |
tāndasyūnvidhunomyajñānpūrvasmācca padādadhaḥ || 5 ||
[Analyze grammar]

so'haṃ durmāyinaste'dya vajreṇa śataparvaṇā |
śiro hariṣye mandātmanghaṭasva jñātibhiḥ saha || 6 ||
[Analyze grammar]

śrībaliruvāca |
saṅgrāme vartamānānāṃ kālacoditakarmaṇām |
kīrtirjayo'jayo mṛtyuḥ sarveṣāṃ syuranukramāt || 7 ||
[Analyze grammar]

tadidaṃ kālaraśanaṃ jagatpaśyanti sūrayaḥ |
na hṛṣyanti na śocanti tatra yūyamapaṇḍitāḥ || 8 ||
[Analyze grammar]

na vayaṃ manyamānānāmātmānaṃ tatra sādhanam |
giro vaḥ sādhuśocyānāṃ gṛhṇīmo marmatāḍanāḥ || 9 ||
[Analyze grammar]

śrīśuka uvāca |
ityākṣipya vibhuṃ vīro nārācairvīramardanaḥ |
ākarṇapūrṇairahanadākṣepairāha taṃ punaḥ || 10 ||
[Analyze grammar]

evaṃ nirākṛto devo vairiṇā tathyavādinā |
nāmṛṣyattadadhikṣepaṃ totrāhata iva dvipaḥ || 11 ||
[Analyze grammar]

prāharatkuliśaṃ tasmā amoghaṃ paramardanaḥ |
sayāno nyapatadbhūmau chinnapakṣa ivācalaḥ || 12 ||
[Analyze grammar]

sakhāyaṃ patitaṃ dṛṣṭvā jambho balisakhaḥ suhṛt |
abhyayātsauhṛdaṃ sakhyurhatasyāpi samācaran || 13 ||
[Analyze grammar]

sa siṃhavāha āsādya gadāmudyamya raṃhasā |
jatrāvatāḍayacchakraṃ gajaṃ ca sumahābalaḥ || 14 ||
[Analyze grammar]

gadāprahāravyathito bhṛśaṃ vihvalito gajaḥ |
jānubhyāṃ dharaṇīṃ spṛṣṭvā kaśmalaṃ paramaṃ yayau || 15 ||
[Analyze grammar]

tato ratho mātalinā haribhirdaśaśatairvṛtaḥ |
ānīto dvipamutsṛjya rathamāruruhe vibhuḥ || 16 ||
[Analyze grammar]

tasya tatpūjayankarma yanturdānavasattamaḥ |
śūlena jvalatā taṃ tu smayamāno'hananmṛdhe || 17 ||
[Analyze grammar]

sehe rujaṃ sudurmarṣāṃ sattvamālambya mātaliḥ |
indro jambhasya saṅkruddho vajreṇāpāharacchiraḥ || 18 ||
[Analyze grammar]

jambhaṃ śrutvā hataṃ tasya jñātayo nāradādṛṣeḥ |
namuciśca balaḥ pākastatrāpetustvarānvitāḥ || 19 ||
[Analyze grammar]

vacobhiḥ paruṣairindra mardayanto'sya marmasu |
śarairavākiranmeghā dhārābhiriva parvatam || 20 ||
[Analyze grammar]

harīndaśaśatānyājau haryaśvasya balaḥ śaraiḥ |
tāvadbhirardayāmāsa yugapallaghuhastavān || 21 ||
[Analyze grammar]

śatābhyāṃ mātaliṃ pāko rathaṃ sāvayavaṃ pṛthak |
sakṛtsandhānamokṣeṇa tadadbhutamabhūdraṇe || 22 ||
[Analyze grammar]

namuciḥ pañcadaśabhiḥ svarṇapuṅkhairmaheṣubhiḥ |
āhatya vyanadatsaṅkhye satoya iva toyadaḥ || 23 ||
[Analyze grammar]

sarvataḥ śarakūṭena śakraṃ sarathasārathim |
chādayāmāsurasurāḥ prāvṛṭsūryamivāmbudāḥ || 24 ||
[Analyze grammar]

alakṣayantastamatīva vihvalā vicukruśurdevagaṇāḥ sahānugāḥ |
anāyakāḥ śatrubalena nirjitā vaṇikpathā bhinnanavo yathārṇave || 25 ||
[Analyze grammar]

tatasturāṣāḍiṣubaddhañjarādvinirgataḥ sāśvarathadhvajāgraṇīḥ |
babhau diśaḥ khaṃ pṛthivīṃ ca rocayansvatejasā sūrya iva kṣapātyaye || 26 ||
[Analyze grammar]

nirīkṣya pṛtanāṃ devaḥ parairabhyarditāṃ raṇe |
udayacchadri puṃ hantuṃ vajraṃ vajradharo ruṣā || 27 ||
[Analyze grammar]

sa tenaivāṣṭadhāreṇa śirasī balapākayoḥ |
jñātīnāṃ paśyatāṃ rājanjahāra janayanbhayam || 28 ||
[Analyze grammar]

namucistadvadhaṃ dṛṣṭvā śokāmarṣaruṣānvitaḥ |
jighāṃsurindraṃ nṛpate cakāra paramodyamam || 29 ||
[Analyze grammar]

aśmasāramayaṃ śūlaṃ ghaṇṭāvaddhemabhūṣaṇam |
pragṛhyābhyadra vatkruddho hato'sīti vitarjayan |
prāhiṇoddevarājāya ninadanmṛgarāḍiva || 30 ||
[Analyze grammar]

tadāpatadgaganatale mahājavaṃ vicicchide haririṣubhiḥ sahasradhā |
tamāhanannṛpa kuliśena kandhare ruṣānvitastridaśapatiḥ śiro haran || 31 ||
[Analyze grammar]

na tasya hi tvacamapi vajra ūrjito bibheda yaḥ surapatinaujaseritaḥ |
tadadbhutaṃ paramativīryavṛtrabhittiraskṛto namuciśirodharatvacā || 32 ||
[Analyze grammar]

tasmādindro 'bibhecchatrorvajraḥ pratihato yataḥ |
kimidaṃ daivayogena bhūtaṃ lokavimohanam || 33 ||
[Analyze grammar]

yena me pūrvamadrīṇāṃ pakṣacchedaḥ prajātyaye |
kṛto niviśatāṃ bhāraiḥ patattraiḥ patatāṃ bhuvi || 34 ||
[Analyze grammar]

tapaḥsāramayaṃ tvāṣṭraṃ vṛtro yena vipāṭitaḥ |
anye cāpi balopetāḥ sarvāstrairakṣatatvacaḥ || 35 ||
[Analyze grammar]

so'yaṃ pratihato vajro mayā mukto'sure'lpake |
nāhaṃ tadādade daṇḍaṃ brahmatejo'pyakāraṇam || 36 ||
[Analyze grammar]

iti śakraṃ viṣīdantamāha vāgaśarīriṇī |
nāyaṃ śuṣkairatho nādrairvadhamarhati dānavaḥ || 37 ||
[Analyze grammar]

mayāsmai yadvaro datto mṛtyurnaivārdra śuṣkayoḥ |
ato'nyaścintanīyaste upāyo maghavanripoḥ || 38 ||
[Analyze grammar]

tāṃ daivīṃ giramākarṇya maghavānsusamāhitaḥ |
dhyāyanphenamathāpaśyadupāyamubhayātmakam || 39 ||
[Analyze grammar]

na śuṣkeṇa na cādrerṇa jahāra namuceḥ śiraḥ |
taṃ tuṣṭuvurmunigaṇā mālyaiścāvākiranvibhum || 40 ||
[Analyze grammar]

gandharvamukhyau jagaturviśvāvasuparāvasū |
devadundubhayo nedurnartakyo nanṛturmudā || 41 ||
[Analyze grammar]

anye'pyevaṃ pratidvandvānvāyvagnivaruṇādayaḥ |
sūdayāmāsurasurānmṛgānkesariṇo yathā || 42 ||
[Analyze grammar]

brahmaṇā preṣito devāndevarṣirnārado nṛpa |
vārayāmāsa vibudhāndṛṣṭvā dānavasaṅkṣayam || 43 ||
[Analyze grammar]

śrīnārada uvāca |
bhavadbhiramṛtaṃ prāptaṃ nārāyaṇabhujāśrayaiḥ |
śriyā samedhitāḥ sarva upāramata vigrahāt || 44 ||
[Analyze grammar]

śrīśuka uvāca |
saṃyamya manyusaṃrambhaṃ mānayanto munervacaḥ |
upagīyamānānucarairyayuḥ sarve triviṣṭapam || 45 ||
[Analyze grammar]

ye'vaśiṣṭā raṇe tasminnāradānumatena te |
baliṃ vipannamādāya astaṃ girimupāgaman || 46 ||
[Analyze grammar]

tatrāvinaṣṭāvayavānvidyamānaśirodharān |
uśanā jīvayāmāsa saṃjīvanyā svavidyayā || 47 ||
[Analyze grammar]

baliścośanasā spṛṣṭaḥ pratyāpannendriyasmṛtiḥ |
parājito'pi nākhidyallokatattvavicakṣaṇaḥ || 48 ||
[Analyze grammar]