Chapter 7

[English text for this chapter is available]

atha saptamo'dhyāyaḥ |
śrīśuka uvāca |
te nāgarājamāmantrya phalabhāgena vāsukim |
parivīya girau tasminnetramabdhiṃ mudānvitāḥ || 1 ||
[Analyze grammar]

ārebhire surā yattā amṛtārthe kurūdvaha |
hariḥ purastājjagṛhe pūrvaṃ devāstato'bhavan || 2 ||
[Analyze grammar]

tannaicchandaityapatayo mahāpuruṣaceṣṭitam |
na gṛhṇīmo vayaṃ pucchamaheraṅgamamaṅgalam || 3 ||
[Analyze grammar]

svādhyāyaśrutasampannāḥ prakhyātā janmakarmabhiḥ |
iti tūṣṇīṃ sthitāndaityānvilokya puruṣottamaḥ |
smayamāno visṛjyāgraṃ pucchaṃ jagrāha sāmaraḥ || 4 ||
[Analyze grammar]

kṛtasthānavibhāgāsta evaṃ kaśyapanandanāḥ |
mamanthuḥ paramaṃ yattā amṛtārthaṃ payonidhim || 6 ||
[Analyze grammar]

mathyamāne'rṇave so'dri ranādhāro hyapo'viśat |
dhriyamāṇo'pi balibhirgauravātpāṇḍunandana || 7 ||
[Analyze grammar]

te sunirviṇṇamanasaḥ parimlānamukhaśriyaḥ |
āsansvapauruṣe naṣṭe daivenātibalīyasā || 8 ||
[Analyze grammar]

vilokya vighneśavidhiṃ tadeśvaro durantavīryo'vitathābhisandhiḥ |
kṛtvā vapuḥ kacchapamadbhutaṃ mahatpraviśya toyaṃ girimujjahāra || 9 ||
[Analyze grammar]

tamutthitaṃ vīkṣya kulācalaṃ punaḥ samudyatā nirmathituṃ surāsurāḥ |
dadhāra pṛṣṭhena sa lakṣayojana prastāriṇā dvīpa ivāparo mahān || 10 ||
[Analyze grammar]

surāsurendrairbhujavīryavepitaṃ paribhramantaṃ girimaṅga pṛṣṭhataḥ |
bibhrattadāvartanamādikacchapo mene'ṅgakaṇḍūyanamaprameyaḥ || 11 ||
[Analyze grammar]

tathāsurānāviśadāsureṇa rūpeṇa teṣāṃ balavīryamīrayan |
uddīpayandevagaṇāṃśca viṣṇurdaivena nāgendramabodharūpaḥ || 12 ||
[Analyze grammar]

uparyagendraṃ girirāḍivānya ākramya hastena sahasrabāhuḥ |
tasthau divi brahmabhavendra mukhyairabhiṣṭuvadbhiḥ sumano'bhivṛṣṭaḥ || 13 ||
[Analyze grammar]

uparyadhaścātmani gotranetrayoḥ pareṇa te prāviśatā samedhitāḥ |
mamanthurabdhiṃ tarasā madotkaṭā mahādriṇā kṣobhitanakracakram || 14 ||
[Analyze grammar]

ahīndra sāhasrakaṭhoradṛṅmukha śvāsāgnidhūmāhatavarcaso'surāḥ |
paulomakāleyabalīlvalādayo davāgnidagdhāḥ saralā ivābhavan || 15 ||
[Analyze grammar]

devāṃśca tacchvāsaśikhāhataprabhāndhūmrāmbarasragvarakañcukānanān |
samabhyavarṣanbhagavadvaśā ghanā vavuḥ samudrormyupagūḍhavāyavaḥ || 16 ||
[Analyze grammar]

mathyamānāttā sindhordevāsuravarūthapaiḥ |
yadā sudhā na jāyeta nirmamanthājitaḥ svayam || 17 ||
[Analyze grammar]

meghaśyāmaḥ kanakaparidhiḥ karṇavidyotavidyun |
mūrdhni bhrājadvilulitakacaḥ sragdharo raktanetraḥ |
jaitrairdorbhirjagadabhayadairdandaśūkaṃ gṛhītvā |
mathnanmathnā pratigiririvāśobhatāthoddhṛtādriḥ || 18 ||
[Analyze grammar]

nirmathyamānādudadherabhūdviṣaṃ maholbaṇaṃ hālahalāhvamagrataḥ |
sambhrāntamīnonmakarāhikacchapāttimidvipagrāhatimiṅgilākulāt || 19 ||
[Analyze grammar]

tadugravegaṃ diśi diśyuparyadho visarpadutsarpadasahyamaprati |
bhītāḥ prajā dudruvuraṅga seśvarā arakṣyamāṇāḥ śaraṇaṃ sadāśivam || 20 ||
[Analyze grammar]

vilokya taṃ devavaraṃ trilokyā bhavāya devyābhimataṃ munīnām |
āsīnamadrā vapavargahetostapo juṣāṇaṃ stutibhiḥ praṇemuḥ || 21 ||
[Analyze grammar]

śrīprajāpataya ūcuḥ |
devadeva mahādeva bhūtātmanbhūtabhāvana |
trāhi naḥ śaraṇāpannāṃstrailokyadahanādviṣāt || 22 ||
[Analyze grammar]

tvamekaḥ sarvajagata īśvaro bandhamokṣayoḥ |
taṃ tvāmarcanti kuśalāḥ prapannārtiharaṃ gurum || 23 ||
[Analyze grammar]

guṇamayyā svaśaktyāsya sargasthityapyayānvibho |
dhatse yadā svadṛgbhūmanbrahmaviṣṇuśivābhidhām || 24 ||
[Analyze grammar]

tvaṃ brahma paramaṃ guhyaṃ sadasadbhāvabhāvanam |
nānāśaktibhirābhātastvamātmā jagadīśvaraḥ || 25 ||
[Analyze grammar]

tvaṃ śabdayonirjagadādirātmā prāṇendri yadra vyaguṇaḥ svabhāvaḥ |
kālaḥ kratuḥ satyamṛtaṃ ca dharmastvayyakṣaraṃ yattrivṛdāmananti || 26 ||
[Analyze grammar]

agnirmukhaṃ te'khiladevatātmā kṣitiṃ vidurlokabhavāṅghripaṅkajam |
kālaṃ gatiṃ te'khiladevatātmano diśaśca karṇau rasanaṃ jaleśam || 27 ||
[Analyze grammar]

nābhirnabhaste śvasanaṃ nabhasvānsūryaśca cakṣūṃṣi jalaṃ sma retaḥ |
parāvarātmāśrayaṇaṃ tavātmā somo mano dyaurbhagavanśiraste || 28 ||
[Analyze grammar]

kukṣiḥ samudrā girayo'sthisaṅghā romāṇi sarvauṣadhivīrudhaste |
chandāṃsi sākṣāttava sapta dhātavastrayīmayātmanhṛdayaṃ sarvadharmaḥ || 29 ||
[Analyze grammar]

mukhāni pañcopaniṣadastaveśa yaistriṃśadaṣṭottaramantravargaḥ |
yattacchivākhyaṃ paramātmatattvaṃ deva svayaṃjyotiravasthitiste || 30 ||
[Analyze grammar]

chāyā tvadharmormiṣu yairvisargo netratrayaṃ sattvarajastamāṃsi |
sāṅkhyātmanaḥ śāstrakṛtastavekṣā chandomayo deva ṛṣiḥ purāṇaḥ || 31 ||
[Analyze grammar]

na te giritrākhilalokapāla viriñcavaikuṇṭhasurendra gamyam |
jyotiḥ paraṃ yatra rajastamaśca sattvaṃ na yadbrahma nirastabhedam || 32 ||
[Analyze grammar]

kāmādhvaratripurakālagarādyaneka |
bhūtadruhaḥ kṣapayataḥ stutaye na tatte |
yastvantakāla idamātmakṛtaṃ svanetra |
vahnisphuliṅgaśikhayā bhasitaṃ na veda || 33 ||
[Analyze grammar]

ye tvātmarāmagurubhirhṛdi cintitāṅghri |
dvandvaṃ carantamumayā tapasābhitaptam |
katthanta ugraparuṣaṃ nirataṃ śmaśāne |
te nūnamūtimavidaṃstava hātalajjāḥ || 34 ||
[Analyze grammar]

tattasya te sadasatoḥ parataḥ parasya |
nāñjaḥ svarūpagamane prabhavanti bhūmnaḥ |
brahmādayaḥ kimuta saṃstavane vayaṃ tu |
tatsargasargaviṣayā api śaktimātram || 35 ||
[Analyze grammar]

etatparaṃ prapaśyāmo na paraṃ te maheśvara |
mṛḍanāya hi lokasya vyaktiste'vyaktakarmaṇaḥ || 36 ||
[Analyze grammar]

śrīśuka uvāca |
tadvīkṣya vyasanaṃ tāsāṃ kṛpayā bhṛśapīḍitaḥ |
sarvabhūtasuhṛddeva idamāha satīṃ priyām || 37 ||
[Analyze grammar]

śrīśiva uvāca |
aho bata bhavānyetatprajānāṃ paśya vaiśasam |
kṣīrodamathanodbhūtātkālakūṭādupasthitam || 38 ||
[Analyze grammar]

āsāṃ prāṇaparīpsūnāṃ vidheyamabhayaṃ hi me |
etāvānhi prabhorartho yaddīnaparipālanam || 39 ||
[Analyze grammar]

prāṇaiḥ svaiḥ prāṇinaḥ pānti sādhavaḥ kṣaṇabhaṅguraiḥ |
baddhavaireṣu bhūteṣu mohiteṣvātmamāyayā || 40 ||
[Analyze grammar]

puṃsaḥ kṛpayato bhadre sarvātmā prīyate hariḥ |
prīte harau bhagavati prīye'haṃ sacarācaraḥ |
tasmādidaṃ garaṃ bhuñje prajānāṃ svastirastu me || 41 ||
[Analyze grammar]

śrīśuka uvāca |
evamāmantrya bhagavānbhavānīṃ viśvabhāvanaḥ |
tadviṣaṃ jagdhumārebhe prabhāvajñānvamodata || 42 ||
[Analyze grammar]

tataḥ karatalīkṛtya vyāpi hālāhalaṃ viṣam |
abhakṣayanmahādevaḥ kṛpayā bhūtabhāvanaḥ || 43 ||
[Analyze grammar]

tasyāpi darśayāmāsa svavīryaṃ jalakalmaṣaḥ |
yaccakāra gale nīlaṃ tacca sādhorvibhūṣaṇam || 44 ||
[Analyze grammar]

tapyante lokatāpena sādhavaḥ prāyaśo janāḥ |
paramārādhanaṃ taddhi puruṣasyākhilātmanaḥ || 45 ||
[Analyze grammar]

niśamya karma tacchambhordevadevasya mīḍhuṣaḥ |
prajā dākṣāyaṇī brahmā vaikuṇṭhaśca śaśaṃsire || 46 ||
[Analyze grammar]

praskannaṃ pibataḥ pāṇeryatkiñcijjagṛhuḥ sma tat |
vṛścikāhiviṣauṣadhyo dandaśūkāśca ye'pare || 47 ||
[Analyze grammar]