Chapter 5

[English text for this chapter is available]

śrīśuka uvāca |
rājan uditametatte hareḥ karmāghanāśanam |
gajendramokṣaṇaṃ puṇyaṃ raivataṃ tvantaraṃ śrṛṇu || 1 ||
[Analyze grammar]

pañcamo raivato nāma manustāmasasodaraḥ |
balivindhyādayastasya sutā hārjunapūrvakāḥ || 2 ||
[Analyze grammar]

vibhurindraḥ suragaṇā rājanbhūtarayādayaḥ |
hiraṇyaromā vedaśirā ūrdhvabāhvādayo dvijāḥ || 3 ||
[Analyze grammar]

pat‍nī vikuṇṭhā śubhrasya vaikuṇṭhaiḥ surasattamaiḥ |
tayoḥ svakalayā jajñe vaikuṇṭho bhagavān svayam || 4 ||
[Analyze grammar]

vaikuṇṭhaḥ kalpito yena loko lokanamaskṛtaḥ |
ramayā prārthyamānena devyā tatpriyakāmyayā || 5 ||
[Analyze grammar]

tasyānubhāvaḥ kathito guṇāśca paramodayāḥ |
bhaumān reṇūnsa vimame yo viṣṇorvarṇayed‍guṇān || 6 ||
[Analyze grammar]

ṣaṣṭhaśca cakṣuṣaḥ putraḥ cākṣuṣo nāma vai manuḥ |
pūru pūruṣa sudyumna pramukhāścākṣuṣātmajāḥ || 7 ||
[Analyze grammar]

indro mantradrumastatra devā āpyādayo gaṇāḥ |
munayastatra vai rājan haviṣmad vīrakādayaḥ || 8 ||
[Analyze grammar]

tatrāpi devaḥ sambhūtyāṃ vairājasyābhavat sutaḥ |
ajito nāma bhagavān aṃśena jagataḥ patiḥ || 9 ||
[Analyze grammar]

payodhiṃ yena nirmathya surāṇāṃ sādhitā sudhā |
bhramamāṇo'mbhasi dhṛtaḥ kūrmarūpeṇa mandaraḥ || 10 ||
[Analyze grammar]

śrīrājovāca |
yathā bhagavatā brahman mathitaḥ kṣīrasāgaraḥ |
yadarthaṃ vā yataścādriṃ dadhārāmbucarātmanā || 11 ||
[Analyze grammar]

yathāmṛtaṃ suraiḥ prāptaṃ kiṃ cānyad abhavat tataḥ |
etad‍bhagavataḥ karma vadasva paramād‍bhutam || 12 ||
[Analyze grammar]

tvayā saṃkathyamānena mahimnā sātvatāṃ pateḥ |
nātitṛpyati me cittaṃ suciraṃ tāpatāpitam || 13 ||
[Analyze grammar]

śrīsūta uvāca |
sampṛṣṭo bhagavānevaṃ dvaipāyanasuto dvijāḥ |
abhinandya harervīryaṃ abhyācaṣṭuṃ pracakrame || 14 ||
[Analyze grammar]

śrīśuka uvāca |
yadā yuddhe'surairdevā badhyamānāḥ śitāyudhaiḥ |
gatāsavo nipatitā nottiṣṭheran sma bhūriśaḥ || 15 ||
[Analyze grammar]

yadā durvāsasaḥ śāpāt sendrā lokāstrayo nṛpa |
niḥśrīkāścābhavaṃstatra neśurijyādayaḥ kriyāḥ || 16 ||
[Analyze grammar]

niśāmyaitat suragaṇā mahendravaruṇādayaḥ |
nādhyagacchansvayaṃ mantraiḥ maṃtrayanto viniścitam || 17 ||
[Analyze grammar]

tato brahmasabhāṃ jagmuḥ merormūrdhani sarvaśaḥ |
sarvaṃ vijñāpayāṃ cakruḥ praṇatāḥ parameṣṭhine || 18 ||
[Analyze grammar]

sa vilokyendravāyvādīn niḥsattvān gagataprabhān |
lokān amaṃgalaprāyān asurānayathā vibhuḥ || 19 ||
[Analyze grammar]

samāhitena manasā saṃsmaran puruṣaṃ param |
uvācotphullavadano devānsa bhagavānparaḥ || 20 ||
[Analyze grammar]

ahaṃ bhavo yūyamatho'surādayo |
manuṣyatiryag drumagharmajātayaḥ |
yasyāvatārāṃśakalāvisarjitā |
vrajāma sarve śaraṇaṃ tamavyayam || 21 ||
[Analyze grammar]

na yasya vadhyo na ca rakṣaṇīyo |
nopekṣaṇīyādaraṇīyapakṣaḥ |
athāpi sargasthitisaṃyamārthaṃ |
dhatte rajaḥsattvatamāṃsi kāle || 22 ||
[Analyze grammar]

ayaṃ ca tasya sthitipālanakṣaṇaḥ |
sattvaṃ juṣāṇasya bhavāya dehinām |
tasmād vrajāmaḥ śaraṇaṃ jagad‍guruṃ |
svānāṃ sa no dhāsyati śaṃ surapriyaḥ || 23 ||
[Analyze grammar]

śrīśuka uvāca |
ityābhāṣya surānvedhāḥ saha devairarindama |
ajitasya padaṃ sākṣāt jagāma tamasaḥ param || 24 ||
[Analyze grammar]

tatrādṛṣṭasvarūpāya śrutapūrvāya vai vibho |
stutimabrūta daivībhiḥ gīrbhistvavahitendriyaḥ || 25 ||
[Analyze grammar]

śrībrahmovāca |
avikriyaṃ satyamanantamādyaṃ |
guhāśayaṃ niṣkalamapratarkyam |
mano'grayānaṃ vacasāniruktaṃ |
namāmahe devavaraṃ vareṇyam || 26 ||
[Analyze grammar]

vipaścitaṃ prāṇamanodhiyātmanāṃ |
arthendriyābhāsamanidramavraṇam |
chāyātapau yatra na gṛdhrapakṣau |
tamakṣaraṃ khaṃ triyugaṃ vrajāmahe || 27 ||
[Analyze grammar]

ajasya cakraṃ tvajayeryamāṇaṃ |
manomayaṃ pañcadaśāramāśu |
trinābhi vidyuccalamaṣṭanemi |
yadakṣamāhustamṛtaṃ prapadye || 28 ||
[Analyze grammar]

ya ekavarṇaṃ tamasaḥ paraṃ tad |
alokamavyaktamanantapāram |
āsāṃ cakāropasuparṇamenaṃ |
upāsate yogarathena dhīrāḥ || 29 ||
[Analyze grammar]

na yasya kaścātititarti māyāṃ |
yayā jano muhyati veda nārtham |
taṃ nirjitātmātmaguṇaṃ pareśaṃ |
namāma bhūteṣu samaṃ carantam || 30 ||
[Analyze grammar]

ime vayaṃ yatpriyayaiva tanvā |
sattvena sṛṣṭā bahirantarāviḥ |
gatiṃ na sūkṣmāmṛṣayaśca vidmahe |
kuto'surādyā itarapradhānāḥ || 31 ||
[Analyze grammar]

pādau mahīyaṃ svakṛtaiva yasya |
caturvidho yatra hi bhūtasargaḥ |
sa vai mahāpūruṣa ātmatantraḥ |
prasīdatāṃ brahma mahāvibhūtiḥ || 32 ||
[Analyze grammar]

ambhastu yadreta udāravīryaṃ |
sidhyanti jīvantyuta vardhamānāḥ |
lokā strayo'thākhilalokapālāḥ |
prasīdatāṃ naḥ sa mahāvibhūtiḥ || 33 ||
[Analyze grammar]

somaṃ mano yasya samāmananti |
divaukasāṃ yo balamandha āyuḥ |
īśo nagānāṃ prajanaḥ prajānāṃ |
prasīdatāṃ naḥ sa mahāvibhūtiḥ || 34 ||
[Analyze grammar]

agnirmukhaṃ yasya tu jātavedā |
jātaḥ kriyākāṇḍanimittajanmā |
antaḥsamudre'nupacansvadhātūn |
prasīdatāṃ naḥ sa mahāvibhūtiḥ || 35 ||
[Analyze grammar]

yaccakṣurāsīttaraṇirdevayānaṃ |
trayīmayo brahmaṇa eṣa dhiṣṇyam |
dvāraṃ ca mukteramṛtaṃ ca mṛtyuḥ |
prasīdatāṃ naḥ sa mahāvibhūtiḥ || 36 ||
[Analyze grammar]

prāṇādabhūd yasya carācarāṇāṃ |
prāṇaḥ saho balamojaśca vāyuḥ |
anvāsma samrājamivānugā vayaṃ |
prasīdatāṃ naḥ sa mahāvibhūtiḥ || 37 ||
[Analyze grammar]

śrotrād diśo yasya hṛdaśca khāni |
prajajñire khaṃ puruṣasya nābhyāḥ |
prāṇendriyātmāsuśarīraketaḥ |
prasīdatāṃ naḥ sa mahāvibhūtiḥ || 38 ||
[Analyze grammar]

balānmahendrastridaśāḥ prasādān |
manyorgirīśo dhiṣaṇādviriñcaḥ |
khebhyastu chandāṃsyṛṣayo meḍhrataḥ kaḥ |
prasīdatāṃ naḥ sa mahāvibhūtiḥ || 39 ||
[Analyze grammar]

śrīrvakṣasaḥ pitaraśchāyayā'san |
dharmaḥ stanāditaraḥ pṛṣṭhato'bhūt |
dyauryasya śīrṣṇo'psaraso vihārāt |
prasīdatāṃ naḥ sa mahāvibhūtiḥ || 40 ||
[Analyze grammar]

vipro mukhaṃ brahma ca yasya guhyaṃ |
rājanya āsīd bhujayorbalaṃ ca |
ūrvorviḍojoṅghriravedaśūdrau |
prasīdatāṃ naḥ sa mahāvibhūtiḥ || 41 ||
[Analyze grammar]

lobho'dharāt prītiruparyabhūd dyutiḥ |
nastaḥ paśavyaḥ sparśena kāmaḥ |
bhruvoryamaḥ pakṣmabhavastu kālaḥ |
prasīdatāṃ naḥ sa mahāvibhūtiḥ || 42 ||
[Analyze grammar]

dravyaṃ vayaḥ karma guṇānviśeṣaṃ |
yadyogamāyāvihitānvadanti |
yaddurvibhāvyaṃ prabudhāpabādhaṃ |
prasīdatāṃ naḥ sa mahāvibhūtiḥ || 43 ||
[Analyze grammar]

namo'stu tasmā upaśāntaśaktaye |
svārājyalābhapratipūritātmane |
guṇeṣu māyāraciteṣu vṛttibhiḥ |
na sajjamānāya nabhasvadūtaye || 44 ||
[Analyze grammar]

sa tvaṃ no darśayātmānaṃ asmat karaṇagocaram |
prapannānāṃ didṛkṣūṇāṃ sasmitaṃ te mukhāmbujam || 45 ||
[Analyze grammar]

taistaiḥ svecchādhṛtai rūpaiḥ kāle kāle svayaṃ vibho |
karma durviṣahaṃ yanno bhagavān tatkaroti hi || 46 ||
[Analyze grammar]

kleśabhūryalpasārāṇi karmāṇi viphalāni vā |
dehināṃ viṣayārtānāṃ na tathaivārpitaṃ tvayi || 47 ||
[Analyze grammar]

nāvamaḥ karmakalpo'pi viphalāyeśvarārpitaḥ |
kalpate puruṣasyaiva sa hyātmā dayito hitaḥ || 48 ||
[Analyze grammar]

yathā hi skandhaśākhānāṃ tarormūlāvasecanam |
evaṃ ārādhanaṃ viṣṇoḥ sarveṣāṃ ātmanaśca hi || 49 ||
[Analyze grammar]

namastubhyaṃ anantāya durvitarkyātmakarmaṇe |
nirguṇāya guṇeśāya sattvasthāya ca sāmpratam || 50 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ aṣṭamaskandhe amṛtamathane pañcamo'dhyāyaḥ || 5 ||
[Analyze grammar]