Chapter 3

[English text for this chapter is available]

atha tṛtīyo'dhyāyaḥ |
śrībādarāyaṇiruvāca |
evaṃ vyavasito buddhyā samādhāya mano hṛdi |
jajāpa paramaṃ jāpyaṃ prāgjanmanyanuśikṣitam || 1 ||
[Analyze grammar]

śrīgajendra uvāca |
oṃ namo bhagavate tasmai yata etaccidātmakam |
puruṣāyādibījāya pareśāyābhidhīmahi || 2 ||
[Analyze grammar]

yasminnidaṃ yataścedaṃ yenedaṃ ya idaṃ svayam |
yo'smātparasmācca parastaṃ prapadye svayambhuvam || 3 ||
[Analyze grammar]

yaḥ svātmanīdaṃ nijamāyayārpitaṃ kvacidvibhātaṃ kva ca tattirohitam |
aviddhadṛksākṣyubhayaṃ tadīkṣate sa ātmamūlo'vatu māṃ parātparaḥ || 4 ||
[Analyze grammar]

kālena pañcatvamiteṣu kṛtsnaśo lokeṣu pāleṣu ca sarvahetuṣu |
tamastadāsīdgahanaṃ gabhīraṃ yastasya pāre'bhivirājate vibhuḥ || 5 ||
[Analyze grammar]

na yasya devā ṛṣayaḥ padaṃ vidurjantuḥ punaḥ ko'rhati gantumīritum |
yathā naṭasyākṛtibhirviceṣṭato duratyayānukramaṇaḥ sa māvatu || 6 ||
[Analyze grammar]

didṛkṣavo yasya padaṃ sumaṅgalaṃ vimuktasaṅgā munayaḥ susādhavaḥ |
carantyalokavratamavraṇaṃ vane bhūtātmabhūtāḥ suhṛdaḥ sa me gatiḥ || 7 ||
[Analyze grammar]

na vidyate yasya ca janma karma vā na nāmarūpe guṇadoṣa eva vā |
tathāpi lokāpyayasambhavāya yaḥ svamāyayā tānyanukālamṛcchati || 8 ||
[Analyze grammar]

tasmai namaḥ pareśāya brahmaṇe'nantaśaktaye |
arūpāyorurūpāya nama āścaryakarmaṇe || 9 ||
[Analyze grammar]

nama ātmapradīpāya sākṣiṇe paramātmane |
namo girāṃ vidūrāya manasaścetasāmapi || 10 ||
[Analyze grammar]

sattvena pratilabhyāya naiṣkarmyeṇa vipaścitā |
namaḥ kaivalyanāthāya nirvāṇasukhasaṃvide || 11 ||
[Analyze grammar]

namaḥ śāntāya ghorāya mūḍhāya guṇadharmiṇe |
nirviśeṣāya sāmyāya namo jñānaghanāya ca || 12 ||
[Analyze grammar]

kṣetrajñāya namastubhyaṃ sarvādhyakṣāya sākṣiṇe |
puruṣāyātmamūlāya mūlaprakṛtaye namaḥ || 13 ||
[Analyze grammar]

sarvendriyaguṇadraṣṭre sarvapratyayahetave |
asatācchāyayoktāya sadābhāsāya te namaḥ || 14 ||
[Analyze grammar]

namo namaste'khilakāraṇāya niṣkāraṇāyādbhutakāraṇāya |
sarvāgamāmnāyamahārṇavāya namo'pavargāya parāyaṇāya || 15 ||
[Analyze grammar]

guṇāraṇicchannaciduṣmapāya tatkṣobhavisphūrjitamānasāya |
naiṣkarmyabhāvena vivarjitāgama svayaṃprakāśāya namaskaromi || 16 ||
[Analyze grammar]

mādṛkprapannapaśupāśavimokṣaṇāya muktāya bhūrikaruṇāya namo'layāya |
svāṃśena sarvatanubhṛnmanasi pratīta pratyagdṛśe bhagavate bṛhate namaste || 17 ||
[Analyze grammar]

ātmātmajāptagṛhavittajaneṣu saktairduṣprāpaṇāya guṇasaṅgavivarjitāya |
muktātmabhiḥ svahṛdaye paribhāvitāya jñānātmane bhagavate nama īśvarāya || 18 ||
[Analyze grammar]

yaṃ dharmakāmārthavimuktikāmā bhajanta iṣṭāṃ gatimāpnuvanti |
kiṃ cāśiṣo rātyapi dehamavyayaṃ karotu me'dabhradayo vimokṣaṇam || 19 ||
[Analyze grammar]

ekāntino yasya na kañcanārthaṃ vāñchanti ye vai bhagavatprapannāḥ |
atyadbhutaṃ taccaritaṃ sumaṅgalaṃ gāyanta ānandasamudra magnāḥ || 20 ||
[Analyze grammar]

tamakṣaraṃ brahma paraṃ pareśamavyaktamādhyātmikayogagamyam |
atīndriyaṃ sūkṣmamivātidūramanantamādyaṃ paripūrṇamīḍe || 21 ||
[Analyze grammar]

yasya brahmādayo devā vedā lokāścarācarāḥ |
nāmarūpavibhedena phalgvyā ca kalayā kṛtāḥ || 22 ||
[Analyze grammar]

yathārciṣo'gneḥ saviturgabhastayo niryānti saṃyāntyasakṛtsvarociṣaḥ |
tathā yato'yaṃ guṇasampravāho buddhirmanaḥ khāni śarīrasargāḥ || 23 ||
[Analyze grammar]

sa vai na devāsuramartyatiryaṅna strī na ṣaṇḍho na pumānna jantuḥ |
nāyaṃ guṇaḥ karma na sanna cāsanniṣedhaśeṣo jayatādaśeṣaḥ || 24 ||
[Analyze grammar]

jijīviṣe nāhamihāmuyā kimantarbahiścāvṛtayebhayonyā |
icchāmi kālena na yasya viplavastasyātmalokāvaraṇasya mokṣam || 25 ||
[Analyze grammar]

so'haṃ viśvasṛjaṃ viśvamaviśvaṃ viśvavedasam |
viśvātmānamajaṃ brahma praṇato'smi paraṃ padam || 26 ||
[Analyze grammar]

yogarandhitakarmāṇo hṛdi yogavibhāvite |
yogino yaṃ prapaśyanti yogeśaṃ taṃ nato'smyaham || 27 ||
[Analyze grammar]

namo namastubhyamasahyavega śaktitrayāyākhiladhīguṇāya |
prapannapālāya durantaśaktaye kadindri yāṇāmanavāpyavartmane || 28 ||
[Analyze grammar]

nāyaṃ veda svamātmānaṃ yacchaktyāhaṃdhiyā hatam |
taṃ duratyayamāhātmyaṃ bhagavantamito'smyaham || 29 ||
[Analyze grammar]

śrīśuka uvāca |
evaṃ gajendramupavarṇitanirviśeṣaṃ |
brahmādayo vividhaliṅgabhidābhimānāḥ |
naite yadopasasṛpurnikhilātmakatvāt |
tatrākhilāmaramayo harirāvirāsīt || 30 ||
[Analyze grammar]

taṃ tadvadārtamupalabhya jagannivāsaḥ |
stotraṃ niśamya divijaiḥ saha saṃstuvadbhiḥ |
chandomayena garuḍena samuhyamānaś |
cakrāyudho'bhyagamadāśu yato gajendra ḥ || 31 ||
[Analyze grammar]

so'ntaḥsarasyurubalena gṛhīta ārto |
dṛṣṭvā garutmati hariṃ kha upāttacakram |
utkṣipya sāmbujakaraṃ giramāha kṛcchrān |
nārāyaṇākhilaguro bhagavannamaste || 32 ||
[Analyze grammar]

taṃ vīkṣya pīḍitamajaḥ sahasāvatīrya |
sagrāhamāśu sarasaḥ kṛpayojjahāra |
grāhādvipāṭitamukhādariṇā gajendraṃ |
saṃpaśyatāṃ hariramūmucaducchriyāṇām || 33 ||
[Analyze grammar]