Chapter 14

[English text for this chapter is available]

śrīmadbhāgavata mahāpurāṇa |
ṣaṣṭhaḥ skandhaḥcaturdaśo'dhyāyaḥ |
vṛtrāsurasya pūrvajanmavṛttānte citraketu upākhyānam |
aṅgiraḥprasādena labdhe svasute vinaṣṭe |
citraketoratyanta śokaḥ kṛtadyutervilāpaścaśrīparīkṣiduvācarajastamaḥsvabhāvasya brahman vṛtrasya pāpmanaḥ |
nārāyaṇe bhagavati kathamāsīd dṛḍhā matiḥ || 1 ||
[Analyze grammar]

devānāṃ śuddhasattvānāṃṛṣīṇāṃ cāmalātmanām |
bhaktirmukundacaraṇe na prāyeṇopajāyate || 2 ||
[Analyze grammar]

rajobhiḥ samasaṅkhyātāḥ pārthivairiha jantavaḥ |
teṣāṃ ye kecanehante śreyo vai manujādayaḥ || 3 ||
[Analyze grammar]

prāyo mumukṣavasteṣāṃ kecanaiva dvijottama |
mumukṣūṇāṃ sahasreṣu kaścin mucyeta sidhyati || 4 ||
[Analyze grammar]

muktānāmapi siddhānāṃ nārāyaṇaparāyaṇaḥ |
sudurlabhaḥ praśāntātmā koṭiṣvapi mahāmune || 5 ||
[Analyze grammar]

vṛtrastu sa kathaṃ pāpaḥ sarvalokopatāpanaḥ |
itthaṃ dṛḍhamatiḥ kṛṣṇa āsīt saṃgrāma ulbaṇe || 6 ||
[Analyze grammar]

atra naḥ saṃśayo bhūyān śrotuṃ kautūhalaṃ prabho |
yaḥ pauruṣeṇa samare sahasrākṣamatoṣayat || 7 ||
[Analyze grammar]

śrīsūta uvācaparīkṣito'tha saṃpraśnaṃ bhagavān bādarāyaṇiḥ |
niśamya śraddadhānasya pratinandya vaco'bravīt || 8 ||
[Analyze grammar]

śrīśuka uvācaśrṛṇuṣu avahito rājan itihāsaṃ imaṃ yathā |
śrutaṃ dvaipāyanamukhāt nāradād devalādapi || 9 ||
[Analyze grammar]

āsīd rājā sārvabhaumaḥ śūraseneṣu vai nṛpa |
citraketuriti khyāto yasyāsīt kāmadhuṅmahī || 10 ||
[Analyze grammar]

tasya bhāryāsahasrāṇāṃ sahasrāṇi daśābhavan |
sāntānikaścāpi nṛpo na lebhe tāsu santatim || 11 ||
[Analyze grammar]

rūpaudāryavayojanma vidyaiśvaryaśriyādibhiḥ |
sampannasya guṇaiḥ sarvaiḥ cintā vandhyāpaterabhūt || 12 ||
[Analyze grammar]

na tasya sampadaḥ sarvā mahiṣyo vāmalocanāḥ |
sārvabhaumasya bhūśceyaṃ abhavan prītihetavaḥ || 13 ||
[Analyze grammar]

tasyaikadā tu bhavanaṃ aṅgirā bhagavān ṛṣiḥ |
lokān anucaran etān upāgacchad yadṛcchayā || 14 ||
[Analyze grammar]

taṃ pūjayitvā vidhivat pratyutthānārhaṇādibhiḥ |
kṛtātithyamupāsīdat sukhāsīnaṃ samāhitaḥ || 15 ||
[Analyze grammar]

maharṣistamupāsīnaṃ praśrayāvanataṃ kṣitau |
pratipūjya mahārāja samābhāṣyedamabravīt || 16 ||
[Analyze grammar]

aṅgirā uvācaapi te'nāmayaṃ svasti prakṛtīnāṃ tathā'tmanaḥ |
yathā prakṛtibhirguptaḥ pumān rājā ca saptabhiḥ || 17 ||
[Analyze grammar]

ātmānaṃ prakṛtiṣvaddhā nidhāya śreya āpnuyāt |
rājñā tathā prakṛtayo naradevāhitādhayaḥ || 18 ||
[Analyze grammar]

api dārāḥ prajāmātyā bhṛtyāḥ śreṇyo'tha mantriṇaḥ |
paurā jānapadā bhūpā ātmajā vaśavartinaḥ || 19 ||
[Analyze grammar]

yasyātmānuvaśaścetsyāt sarve tadvaśagā ime |
lokāḥ sapālā yacchanti sarve balimatandritāḥ || 20 ||
[Analyze grammar]

ātmanaḥ prīyate nātmā parataḥ svata eva vā |
lakṣaye'labdhakāmaṃ tvāṃ cintayā śabalaṃ mukham || 21 ||
[Analyze grammar]

evaṃ vikalpito rājanviduṣā munināpi saḥ |
praśrayāvanato'bhyāha prajākāmastato munim || 22 ||
[Analyze grammar]

citraketuruvācabhagavan kiṃ na viditaṃ tapojñānasamādhibhiḥ |
yogināṃ dhvastapāpānāṃ bahirantaḥ śarīriṣu || 23 ||
[Analyze grammar]

tathāpi pṛcchato brūyāṃ brahman ātmani cintitam |
bhavato viduṣaścāpi coditastvadanujñayā || 24 ||
[Analyze grammar]

lokapālairapi prārthyāḥ sāmrājyaiśvaryasampadaḥ |
na nandayantyaprajaṃ māṃ kṣuttṛṭkāmaṃ ivāpare || 25 ||
[Analyze grammar]

tataḥ pāhi mahābhāga pūrvaiḥ saha gataṃ tamaḥ |
yathā tarema duṣpāraṃ prajayā tadvidhehi naḥ || 26 ||
[Analyze grammar]

śrīśuka uvācaityarthitaḥ sa bhagavānkṛpālurbrahmaṇaḥ sutaḥ |
śrapayitvā caruṃ tvāṣṭraṃ tvaṣṭāramayajad vibhuḥ || 27 ||
[Analyze grammar]

jyeṣṭhā śreṣṭhā ca yā rājño mahiṣīṇāṃ ca bhārata |
nāmnā kṛtadyutistasyai yajñocchiṣṭamadād dvijaḥ || 28 ||
[Analyze grammar]

athāha nṛpatiṃ rājan bhavitaikastavātmajaḥ |
harṣaśokapradastubhyaṃ iti brahmasuto yayau || 29 ||
[Analyze grammar]

sāpi tatprāśanādeva citraketoradhārayat |
garbhaṃ kṛtadyutirdevī kṛttikāgnerivātmajam || 30 ||
[Analyze grammar]

tasyā anudinaṃ garbhaḥ śuklapakṣa ivoḍupaḥ |
vavṛdhe śūraseneśa tejasā śanakairnṛpa || 31 ||
[Analyze grammar]

atha kāla upāvṛtte kumāraḥ samajāyata |
janayan śūrasenānāṃ śrṛṇvatāṃ paramāṃ mudam || 32 ||
[Analyze grammar]

hṛṣṭo rājā kumārasya snātaḥ śuciralaṅkṛtaḥ |
vācayitvāśiṣo vipraiḥ kārayāmāsa jātakam || 33 ||
[Analyze grammar]

tebhyo hiraṇyaṃ rajataṃ vāsāṃsyābharaṇāni ca |
grāmān hayān gajān prādād dhenūnāṃ arbudāni ṣaṭ || 34 ||
[Analyze grammar]

vavarṣa kāmānanyeṣāṃ parjanya iva dehinām |
dhanyaṃ yaśasyamāyuṣyaṃ kumārasya mahāmanāḥ || 35 ||
[Analyze grammar]

kṛcchralabdhe'tha rājarṣeḥ tanaye'nudinaṃ pituḥ |
yathā niḥsvasya kṛcchrāpte dhane sneho'nvavardhata || 36 ||
[Analyze grammar]

mātustvatitarāṃ putre sneho mohasamud‍bhavaḥ |
kṛtadyuteḥ sapat‍nīnāṃ prajākāmajvaro'bhavat || 37 ||
[Analyze grammar]

citraketoḥ atiprītiḥ yathā dāre prajāvati |
na tathānyeṣu sañjajñe bālaṃ lālayato'nvaham || 38 ||
[Analyze grammar]

tāḥ paryatapyan ātmānaṃ garhayantyo'bhyasūyayā |
ānapatyena duḥkhena rājño'nādaraṇena ca || 39 ||
[Analyze grammar]

dhigaprajāṃ striyaṃ pāpāṃ patyuścāgṛhasammatām |
suprajābhiḥ sapat‍nībhiḥ dāsīmiva tiraskṛtām || 40 ||
[Analyze grammar]

dāsīnāṃ ko nu santāpaḥ svāminaḥ paricaryayā |
abhīkṣṇaṃ labdhamānānāṃ dāsyā dāsīva durbhagāḥ || 41 ||
[Analyze grammar]

evaṃ sandahyamānānāṃ sapat‍nyāḥ putrasampadā |
rājño'sammatavṛttīnāṃ vidveṣo balavānabhūt || 42 ||
[Analyze grammar]

vidveṣanaṣṭamatayaḥ striyo dāruṇacetasaḥ |
garaṃ daduḥ kumārāya durmarṣā nṛpatiṃ prati || 43 ||
[Analyze grammar]

kṛtadyutirajānantī sapat‍nīnāmaghaṃ mahat |
supta eveti sañcintya nirīkṣya vyacarad‍gṛhe || 44 ||
[Analyze grammar]

śayānaṃ suciraṃ bālaṃ upadhārya manīṣiṇī |
putramānaya me bhadre iti dhātrīmacodayat || 45 ||
[Analyze grammar]

sā śayānamupavrajya dṛṣṭvā cottāralocanam |
prāṇendriyātmabhistyaktaṃ hatāsmītyapatad‍bhuvi || 46 ||
[Analyze grammar]

tasyāstadā'karṇya bhṛśāturaṃ svaraṃ |
ghnantyāḥ karābhyāmura uccakairapi |
praviśya rājñī tvarayā'tmajāntikaṃ |
dadarśa bālaṃ sahasā mṛtaṃ sutam || 47 ||
[Analyze grammar]

papāta bhūmau parivṛddhayā śucā |
mumoha vibhraṣṭaśiroruhāmbarā || 48 ||
[Analyze grammar]

tato nṛpāntaḥpuravartino janā |
narāśca nāryaśca niśamya rodanam |
āgatya tulyavyasanāḥ suduḥkhitāḥ |
tāśca vyalīkaṃ ruruduḥ kṛtāgasaḥ || 49 ||
[Analyze grammar]

śrutvā mṛtaṃ putramalakṣitāntakaṃ |
vinaṣṭadṛṣṭiḥ prapatam skhalanpathi |
snehānubandhaidhitayā śucā bhṛśaṃ |
vimūrcchito'nuprakṛtirdvijairvṛtaḥ || 50 ||
[Analyze grammar]

papāta bālasya sa pādamūle |
mṛtasya visrastaśiroruhāmbaraḥ |
dīrghaṃ śvasan bāṣpakaloparodhato |
niruddhakaṇṭho na śaśāka bhāṣitum || 51 ||
[Analyze grammar]

patiṃ nirīkṣyoruśucārpitaṃ tadā |
mṛtaṃ ca bālaṃ sutamekasantatim |
janasya rājñī prakṛteśca hṛdrujaṃ |
satī dadhānā vilalāpa citradhā || 52 ||
[Analyze grammar]

stanadvayaṃ kuṅkumapaṅkamaṇḍitaṃ |
niṣiñcatī sāñjanabāṣpabindubhiḥ |
vikīrya keśānvigalatsrajaḥ sutaṃ |
śuśoca citraṃ kurarīva susvaram || 53 ||
[Analyze grammar]

aho vidhātastvamatīva bāliśo |
yastvātmasṛṣṭyapratirūpamīhase |
pare nu jīvatyaparasya yā mṛtiḥ |
viparyayaścettvamasi dhruvaḥ paraḥ || 54 ||
[Analyze grammar]

na hi kramaścediha mṛtyujanmanoḥ |
śarīriṇāmastu tadātmakarmabhiḥ |
yaḥ snehapāśo nijasargavṛddhaye |
svayaṃ kṛtaste tamimaṃ vivṛścasi || 55 ||
[Analyze grammar]

tvaṃ tāta nārhasi ca māṃ kṛpaṇāmanāthāṃ |
tyaktuṃ vicakṣva pitaraṃ tava śokataptam |
añjastarema bhavatāprajadustaraṃ yad |
dhvāntaṃ na yāhyakaruṇena yamena dūram || 56 ||
[Analyze grammar]

uttiṣṭha tāta ta ime śiśavo vayasyāḥ |
tvāṃ āhvayanti nṛpanandana saṃvihartum |
suptaściraṃ hyaśanayā ca bhavān parīto |
bhuṅkṣva stanaṃ piba śuco hara naḥ svakānām || 57 ||
[Analyze grammar]

nāhaṃ tanūja dadṛśe hatamaṅgalā te |
mugdhasmitaṃ muditavīkṣaṇamānanābjam |
kiṃ vā gato'syapunaranvayamanyalokaṃ |
nīto'ghṛṇena na śrṛṇomi kalā giraste || 58 ||
[Analyze grammar]

śrīśuka uvācavilapantyā mṛtaṃ putraṃ iti citravilāpanaiḥ |
citraketurbhṛśaṃ tapto muktakaṇṭho ruroda ha || 59 ||
[Analyze grammar]

tayorvilapatoḥ sarve dampatyostadanuvratāḥ |
ruruduḥ sma narā nāryaḥ sarvamāsīdacetanam || 60 ||
[Analyze grammar]

evaṃ kaśmalamāpannaṃ naṣṭasaṃjñamanāyakam |
jñātvāṅgirā nāma muniḥ ājagāma sanāradaḥ || 61 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
ṣaṣṭhaskandhe citraketuvilāpo nāma caturśo'dhyā‍yaḥ || 14 ||
[Analyze grammar]