Chapter 4

[English text for this chapter is available]

atha caturtho'dhyāyaḥ |
śrīrājovāca |
devāsuranṛṇāṃ sargo nāgānāṃ mṛgapakṣiṇām |
sāmāsikastvayā prokto yastu svāyambhuve'ntare || 1 ||
[Analyze grammar]

tasyaiva vyāsamicchāmi jñātuṃ te bhagavanyathā |
anusargaṃ yayā śaktyā sasarja bhagavānparaḥ || 2 ||
[Analyze grammar]

śrīsūta uvāca |
iti sampraśnamākarṇya rājarṣerbādarāyaṇiḥ |
pratinandya mahāyogī jagāda munisattamāḥ || 3 ||
[Analyze grammar]

śrīśuka uvāca |
yadā pracetasaḥ putrā daśa prācīnabarhiṣaḥ |
antaḥsamudrādunmagnā dadṛśurgāṃ drumairvṛtām || 4 ||
[Analyze grammar]

drumebhyaḥ krudhyamānāste tapodīpitamanyavaḥ |
mukhato vāyumagniṃ ca sasṛjustaddidhakṣayā || 5 ||
[Analyze grammar]

tābhyāṃ nirdahyamānāṃstānupalabhya kurūdvaha |
rājovāca mahānsomo manyuṃ praśamayanniva || 6 ||
[Analyze grammar]

na drumebhyo mahābhāgā dīnebhyo drogdhumarhatha |
vivardhayiṣavo yūyaṃ prajānāṃ patayaḥ smṛtāḥ || 7 ||
[Analyze grammar]

aho prajāpatipatirbhagavānhariravyayaḥ |
vanaspatīnoṣadhīśca sasarjorjamiṣaṃ vibhuḥ || 8 ||
[Analyze grammar]

annaṃ carāṇāmacarā hyapadaḥ pādacāriṇām |
ahastā hastayuktānāṃ dvipadāṃ ca catuṣpadaḥ || 9 ||
[Analyze grammar]

yūyaṃ ca pitrānvādiṣṭā devadevena cānaghāḥ |
prajāsargāya hi kathaṃ vṛkṣānnirdagdhumarhatha || 10 ||
[Analyze grammar]

ātiṣṭhata satāṃ mārgaṃ kopaṃ yacchata dīpitam |
pitrā pitāmahenāpi juṣṭaṃ vaḥ prapitāmahaiḥ || 11 ||
[Analyze grammar]

tokānāṃ pitarau bandhū dṛśaḥ pakṣma striyāḥ patiḥ |
patiḥ prajānāṃ bhikṣūṇāṃ gṛhyajñānāṃ budhaḥ suhṛt || 12 ||
[Analyze grammar]

antardeheṣu bhūtānāmātmāste harirīśvaraḥ |
sarvaṃ taddhiṣṇyamīkṣadhvamevaṃ vastoṣito hyasau || 13 ||
[Analyze grammar]

yaḥ samutpatitaṃ deha ākāśānmanyumulbaṇam |
ātmajijñāsayā yacchetsa guṇānativartate || 14 ||
[Analyze grammar]

alaṃ dagdhairdrumairdīnaiḥ khilānāṃ śivamastu vaḥ |
vārkṣī hyeṣā varā kanyā patnītve pratigṛhyatām || 15 ||
[Analyze grammar]

ityāmantrya varārohāṃ kanyāmāpsarasīṃ nṛpa |
somo rājā yayau dattvā te dharmeṇopayemire || 16 ||
[Analyze grammar]

tebhyastasyāṃ samabhavaddakṣaḥ prācetasaḥ kila |
yasya prajāvisargeṇa lokā āpūritāstrayaḥ || 17 ||
[Analyze grammar]

yathā sasarja bhūtāni dakṣo duhitṛvatsalaḥ |
retasā manasā caiva tanmamāvahitaḥ śṛṇu || 18 ||
[Analyze grammar]

manasaivāsṛjatpūrvaṃ prajāpatirimāḥ prajāḥ |
devāsuramanuṣyādīnnabhaḥsthalajalaukasaḥ || 19 ||
[Analyze grammar]

tamabṛṃhitamālokya prajāsargaṃ prajāpatiḥ |
vindhyapādānupavrajya so'caradduṣkaraṃ tapaḥ || 20 ||
[Analyze grammar]

tatrāghamarṣaṇaṃ nāma tīrthaṃ pāpaharaṃ param |
upaspṛśyānusavanaṃ tapasātoṣayaddharim || 21 ||
[Analyze grammar]

astauṣīddhaṃsaguhyena bhagavantamadhokṣajam |
tubhyaṃ tadabhidhāsyāmi kasyātuṣyadyathā hariḥ || 22 ||
[Analyze grammar]

śrīprajāpatiruvāca |
namaḥ parāyāvitathānubhūtaye guṇatrayābhāsanimittabandhave |
adṛṣṭadhāmne guṇatattvabuddhibhirnivṛttamānāya dadhe svayambhuve || 23 ||
[Analyze grammar]

na yasya sakhyaṃ puruṣo'vaiti sakhyuḥ sakhā vasansaṃvasataḥ pure'smin |
guṇo yathā guṇino vyaktadṛṣṭestasmai maheśāya namaskaromi || 24 ||
[Analyze grammar]

deho'savo'kṣā manavo bhūtamātrāmātmānamanyaṃ ca viduḥ paraṃ yat |
sarvaṃ pumānveda guṇāṃśca tajjño na veda sarvajñamanantamīḍe || 25 ||
[Analyze grammar]

yadoparāmo manaso nāmarūpa rūpasya dṛṣṭasmṛtisampramoṣāt |
ya īyate kevalayā svasaṃsthayā haṃsāya tasmai śucisadmane namaḥ || 26 ||
[Analyze grammar]

manīṣiṇo'ntarhṛdi sanniveśitaṃ svaśaktibhirnavabhiśca trivṛdbhiḥ |
vahniṃ yathā dāruṇi pāñcadaśyaṃ manīṣayā niṣkarṣanti gūḍham || 27 ||
[Analyze grammar]

sa vai mamāśeṣaviśeṣamāyā niṣedhanirvāṇasukhānubhūtiḥ |
sa sarvanāmā sa ca viśvarūpaḥ prasīdatāmaniruktātmaśaktiḥ || 28 ||
[Analyze grammar]

yadyanniruktaṃ vacasā nirūpitaṃ dhiyākṣabhirvā manasā vota yasya |
mā bhūtsvarūpaṃ guṇarūpaṃ hi tattatsa vai guṇāpāyavisargalakṣaṇaḥ || 29 ||
[Analyze grammar]

yasminyato yena ca yasya yasmai yadyo yathā kurute kāryate ca |
parāvareṣāṃ paramaṃ prākprasiddhaṃ tadbrahma taddheturananyadekam || 30 ||
[Analyze grammar]

yacchaktayo vadatāṃ vādināṃ vai vivādasaṃvādabhuvo bhavanti |
kurvanti caiṣāṃ muhurātmamohaṃ tasmai namo'nantaguṇāya bhūmne || 31 ||
[Analyze grammar]

astīti nāstīti ca vastuniṣṭhayorekasthayorbhinnaviruddhadharmaṇoḥ |
avekṣitaṃ kiñcana yogasāṅkhyayoḥ samaṃ paraṃ hyanukūlaṃ bṛhattat || 32 ||
[Analyze grammar]

yo'nugrahārthaṃ bhajatāṃ pādamūlamanāmarūpo bhagavānanantaḥ |
nāmāni rūpāṇi ca janmakarmabhirbheje sa mahyaṃ paramaḥ prasīdatu || 33 ||
[Analyze grammar]

yaḥ prākṛtairjñānapathairjanānāṃ yathāśayaṃ dehagato vibhāti |
yathānilaḥ pārthivamāśrito guṇaṃ sa īśvaro me kurutāṃ manoratham || 34 ||
[Analyze grammar]

śrīśuka uvāca |
iti stutaḥ saṃstuvataḥ sa tasminnaghamarṣaṇe |
prādurāsītkuruśreṣṭha bhagavānbhaktavatsalaḥ || 35 ||
[Analyze grammar]

kṛtapādaḥ suparṇāṃse pralambāṣṭamahābhujaḥ |
cakraśaṅkhāsicarmeṣu dhanuḥpāśagadādharaḥ || 36 ||
[Analyze grammar]

pītavāsā ghanaśyāmaḥ prasannavadanekṣaṇaḥ |
vanamālānivītāṅgo lasacchrīvatsakaustubhaḥ || 37 ||
[Analyze grammar]

mahākirīṭakaṭakaḥ sphuranmakarakuṇḍalaḥ |
kāñcyaṅgulīyavalaya nūpurāṅgadabhūṣitaḥ || 38 ||
[Analyze grammar]

trailokyamohanaṃ rūpaṃ bibhrattribhuvaneśvaraḥ |
vṛto nāradanandādyaiḥ pārṣadaiḥ surayūthapaiḥ || 39 ||
[Analyze grammar]

stūyamāno'nugāyadbhiḥ siddhagandharvacāraṇaiḥ |
rūpaṃ tanmahadāścaryaṃ vicakṣyāgatasādhvasaḥ || 40 ||
[Analyze grammar]

nanāma daṇḍavadbhūmau prahṛṣṭātmā prajāpatiḥ |
na kiñcanodīrayitumaśakattīvrayā mudā |
āpūritamanodvārairhradinya iva nirjharaiḥ || 41 ||
[Analyze grammar]

taṃ tathāvanataṃ bhaktaṃ prajākāmaṃ prajāpatim |
cittajñaḥ sarvabhūtānāmidamāha janārdanaḥ || 42 ||
[Analyze grammar]

śrībhagavānuvāca |
prācetasa mahābhāga saṃsiddhastapasā bhavān |
yacchraddhayā matparayā mayi bhāvaṃ paraṃ gataḥ || 43 ||
[Analyze grammar]

prīto'haṃ te prajānātha yatte'syodbṛṃhaṇaṃ tapaḥ |
mamaiṣa kāmo bhūtānāṃ yadbhūyāsurvibhūtayaḥ || 44 ||
[Analyze grammar]

brahmā bhavo bhavantaśca manavo vibudheśvarāḥ |
vibhūtayo mama hyetā bhūtānāṃ bhūtihetavaḥ || 45 ||
[Analyze grammar]

tapo me hṛdayaṃ brahmaṃstanurvidyā kriyākṛtiḥ |
aṅgāni kratavo jātā dharma ātmāsavaḥ surāḥ || 46 ||
[Analyze grammar]

ahamevāsamevāgre nānyatkiñcāntaraṃ bahiḥ |
saṃjñānamātramavyaktaṃ prasuptamiva viśvataḥ || 47 ||
[Analyze grammar]

mayyanantaguṇe'nante guṇato guṇavigrahaḥ |
yadāsīttata evādyaḥ svayambhūḥ samabhūdajaḥ || 48 ||
[Analyze grammar]

sa vai yadā mahādevo mama vīryopabṛṃhitaḥ |
mene khilamivātmānamudyataḥ svargakarmaṇi || 49 ||
[Analyze grammar]

atha me'bhihito devastapo'tapyata dāruṇam |
nava viśvasṛjo yuṣmānyenādāvasṛjadvibhuḥ || 50 ||
[Analyze grammar]

eṣā pañcajanasyāṅga duhitā vai prajāpateḥ |
asiknī nāma patnītve prajeśa pratigṛhyatām || 51 ||
[Analyze grammar]

mithunavyavāyadharmastvaṃ prajāsargamimaṃ punaḥ |
mithunavyavāyadharmiṇyāṃ bhūriśo bhāvayiṣyasi || 52 ||
[Analyze grammar]

tvatto'dhastātprajāḥ sarvā mithunībhūya māyayā |
madīyayā bhaviṣyanti hariṣyanti ca me balim || 53 ||
[Analyze grammar]

śrīśuka uvāca |
ityuktvā miṣatastasya bhagavānviśvabhāvanaḥ |
svapnopalabdhārtha iva tatraivāntardadhe hariḥ || 54 ||
[Analyze grammar]