Chapter 28

[English text for this chapter is available]

nārada uvāca |
sainikā bhayanāmno ye barhiṣman dindiṣṭakāriṇaḥ |
prajvārakālakanyābhyāṃ viceruḥ avanīmimām || 1 ||
[Analyze grammar]

te ekadā tu rabhasā purañjanapurīṃ nṛpa |
rurudhurbhaumabhogāḍhyāṃ jaratpannagapālitām || 2 ||
[Analyze grammar]

kālakanyāpi bubhuje purañjanapuraṃ balāt |
yayābhibhūtaḥ puruṣaḥ sadyo niḥsāratāmiyāt || 3 ||
[Analyze grammar]

tayopabhujyamānāṃ vai yavanāḥ sarvatodiśam |
dvārbhiḥ praviśya subhṛśaṃ prārdayan sakalāṃ purīm || 4 ||
[Analyze grammar]

tasyāṃ prapīḍyamānāyāṃ abhimānī purañjanaḥ |
avāporuvidhān tāpān kuṭumbī mamatākulaḥ || 5 ||
[Analyze grammar]

kanyopagūḍho naṣṭaśrīḥ kṛpaṇo viṣayātmakaḥ |
naṣṭaprajño hṛtaiśvaryo gandharvayavanairbalāt || 6 ||
[Analyze grammar]

viśīrṇāṃ svapurīṃ vīkṣya pratikūlānanādṛtān |
putrān pautrānugāmātyān jāyāṃ ca gatasauhṛdām || 7 ||
[Analyze grammar]

ātmānaṃ kanyayā grastaṃ pañcālān aridūṣitān |
durantacintāmāpanno na lebhe tatpratikriyām || 8 ||
[Analyze grammar]

kāmānabhilaṣandīno yātayāmāṃśca kanyayā |
vigatātmagatisnehaḥ putradārāṃśca lālayan || 9 ||
[Analyze grammar]

gandharvayavanākrāntāṃ kālakanyopamarditām |
hātuṃ pracakrame rājā tāṃ purīmanikāmataḥ || 10 ||
[Analyze grammar]

bhayanāmno'grajo bhrātā prajvāraḥ pratyupasthitaḥ |
dadāha tāṃ purīṃ kṛtsnāṃ bhrātuḥ priyacikīrṣayā || 11 ||
[Analyze grammar]

tasyāṃ sandahyamānāyāṃ sapauraḥ saparicchadaḥ |
kauṭumbikaḥ kuṭumbinyā upātapyata sānvayaḥ || 12 ||
[Analyze grammar]

yavanoparuddhāyatano grastāyāṃ kālakanyayā |
puryāṃ prajvārasaṃsṛṣṭaḥ purapālo'nvatapyata || 13 ||
[Analyze grammar]

na śeke so'vituṃ tatra purukṛcchroruvepathuḥ |
gantumaicchattato vṛkṣa koṭarādiva sānalāt || 14 ||
[Analyze grammar]

śithilāvayavo yarhi gandharvairhṛtapauruṣaḥ |
yavanairaribhī rājan uparuddho ruroda ha || 15 ||
[Analyze grammar]

duhitṝ putrapautrāṃśca jāmijāmātṛpārṣadān |
svatvāvaśiṣṭaṃ yatkiñcid gṛhakośaparicchadam || 16 ||
[Analyze grammar]

ahaṃ mameti svīkṛtya gṛheṣu kumatirgṛhī |
dadhyau pramadayā dīno viprayoga upasthite || 17 ||
[Analyze grammar]

lokāntaraṃ gatavati mayyanāthā kuṭumbinī |
vartiṣyate kathaṃ tveṣā bālakān anuśocatī || 18 ||
[Analyze grammar]

na mayyanāśite bhuṅkte nāsnāte snāti matparā |
mayi ruṣṭe susantrastā bhartsite yatavāgbhayāt || 19 ||
[Analyze grammar]

prabodhayati māvijñaṃ vyuṣite śokakarśitā |
vartmaitad gṛhamedhīyaṃ vīrasūrapi neṣyati || 20 ||
[Analyze grammar]

kathaṃ nu dārakā dīnā dārakīrvāparāyaṇāḥ |
vartiṣyante mayi gate bhinnanāva ivodadhau || 21 ||
[Analyze grammar]

evaṃ kṛpaṇayā buddhyā śocantamatadarhaṇam |
grahītuṃ kṛtadhīrenaṃ bhayanāmābhyapadyata || 22 ||
[Analyze grammar]

paśuvadyavanaireṣa nīyamānaḥ svakaṃ kṣayam |
anvadravannanupathāḥ śocanto bhṛśamāturāḥ || 23 ||
[Analyze grammar]

purīṃ vihāyopagata uparuddho bhujaṅgamaḥ |
yadā tamevānu purī viśīrṇā prakṛtiṃ gatā || 24 ||
[Analyze grammar]

vikṛṣyamāṇaḥ prasabhaṃ yavanena balīyasā |
nāvindattamasā'viṣṭaḥ sakhāyaṃ suhṛdaṃ puraḥ || 25 ||
[Analyze grammar]

taṃ yajñapaśavo'nena saṃjñaptā ye'dayālunā |
kuṭhāraiścicchiduḥ kruddhāḥ smaranto'mīvamasya tat || 26 ||
[Analyze grammar]

anantapāre tamasi magno naṣṭasmṛtiḥ samāḥ |
śāśvatīranubhūyārtiṃ pramadāsaṅgadūṣitaḥ || 27 ||
[Analyze grammar]

tāmeva manasā gṛhṇan babhūva pramadottamā |
anantaraṃ vidarbhasya rājasiṃhasya veśmani || 28 ||
[Analyze grammar]

upayeme vīryapaṇāṃ vaidarbhīṃ malayadhvajaḥ |
yudhi nirjitya rājanyān pāṇḍyaḥ parapurañjayaḥ || 29 ||
[Analyze grammar]

tasyāṃ sa janayāṃ cakra ātmajāmasitekṣaṇām |
yavīyasaḥ sapta sutān sapta draviḍabhūbhṛtaḥ || 30 ||
[Analyze grammar]

ekaikasyābhavatteṣāṃ rājan arbudamarbudam |
bhokṣyate yadvaṃśadharaiḥ mahī manvantaraṃ param || 31 ||
[Analyze grammar]

agastyaḥ prāgduhitaraṃ upayeme dhṛtavratām |
yasyāṃ dṛḍhacyuto jāta idhmavāhātmajo muniḥ || 32 ||
[Analyze grammar]

vibhajya tanayebhyaḥ kṣmāṃ rājarṣirmalayadhvajaḥ |
ārirādhayiṣuḥ kṛṣṇaṃ sa jagāma kulācalam || 33 ||
[Analyze grammar]

hitvā gṛhān sutān bhogān vaidarbhī madirekṣaṇā |
anvadhāvata pāṇḍyeśaṃ jyotsneva rajanīkaram || 34 ||
[Analyze grammar]

tatra candravasā nāma tāmraparṇī vaṭodakā |
tatpuṇyasalilairnityaṃ ubhayatrātmano mṛjan || 35 ||
[Analyze grammar]

kandāṣṭibhirmūlaphalaiḥ puṣpaparṇaistṛṇodakaiḥ |
vartamānaḥ śanairgātra karśanaṃ tapa āsthitaḥ || 36 ||
[Analyze grammar]

śītoṣṇavātavarṣāṇi kṣutpipāse priyāpriye |
sukhaduḥkhe iti dvandvānyajayatsamadarśanaḥ || 37 ||
[Analyze grammar]

tapasā vidyayā pakva kaṣāyo niyamairyamaiḥ |
yuyuje brahmaṇyātmānaṃ vijitākṣānilāśayaḥ || 38 ||
[Analyze grammar]

āste sthāṇurivaikatra divyaṃ varṣaśataṃ sthiraḥ |
vāsudeve bhagavati nānyad vedodvahan ratim || 39 ||
[Analyze grammar]

sa vyāpakatayā'tmānaṃ vyatiriktatayā'tmani |
vidvānsvapna ivāmarśa sākṣiṇaṃ virarāma ha || 40 ||
[Analyze grammar]

sākṣād‍bhagavatoktena guruṇā hariṇā nṛpa |
viśuddhajñānadīpena sphuratā viśvatomukham || 41 ||
[Analyze grammar]

pare brahmaṇi cātmānaṃ paraṃ brahma tathātmani |
vīkṣamāṇo vihāyekṣāṃ asmād upararāma ha || 42 ||
[Analyze grammar]

patiṃ paramadharmajñaṃ vaidarbhī malayadhvajam |
premṇā paryacaraddhitvā bhogān sā patidevatā || 43 ||
[Analyze grammar]

cīravāsā vratakṣāmā veṇībhūtaśiroruhā |
babhāvupapatiṃ śāntā śikhā śāntamivānalam || 44 ||
[Analyze grammar]

ajānatī priyatamaṃ yadoparatamaṅganā |
susthirāsanamāsādya yathāpūrvamupācarat || 45 ||
[Analyze grammar]

yadā nopalabhetāṅghrau ūṣmāṇaṃ patyurarcatī |
āsīt saṃvignahṛdayā yūthabhraṣṭā mṛgī yathā || 46 ||
[Analyze grammar]

ātmānaṃ śocatī dīnaṃ abandhuṃ viklavāśrubhiḥ |
stanau āsicya vipine susvaraṃ praruroda sā || 47 ||
[Analyze grammar]

uttiṣṭhottiṣṭha rājarṣe imāṃ udadhimekhalām |
dasyubhyaḥ kṣatrabandhubhyo bibhyatīṃ pātumarhasi || 48 ||
[Analyze grammar]

evaṃ vilapantī bālā vipine'nugatā patim |
patitā pādayorbhartū rudatyaśrūṇyavartayat || 49 ||
[Analyze grammar]

citiṃ dārumayīṃ citvā tasyāṃ patyuḥ kalevaram |
ādīpya cānumaraṇe vilapantī mano dadhe || 50 ||
[Analyze grammar]

tatra pūrvataraḥ kaścit sakhā brāhmaṇa ātmavān |
sāntvayanvalgunā sāmnā tāmāha rudatīṃ prabho || 51 ||
[Analyze grammar]

brāhmaṇa uvāca |
kā tvaṃ kasyāsi ko vāyaṃ śayāno yasya śocasi |
jānāsi kiṃ sakhāyaṃ māṃ yenāgre vicacartha ha || 52 ||
[Analyze grammar]

api smarasi cātmānaṃ avijñātasakhaṃ sakhe |
hitvā māṃ padamanvicchan bhaumabhogarato gataḥ || 53 ||
[Analyze grammar]

haṃsāvahaṃ ca tvaṃ cārya sakhāyau mānasāyanau |
abhūtāmantarā vaukaḥ sahasraparivatsarān || 54 ||
[Analyze grammar]

sa tvaṃ vihāya māṃ bandho gato grāmyamatirmahīm |
vicaran padamadrākṣīḥ kayācin nirmitaṃ striyā || 55 ||
[Analyze grammar]

pañcārāmaṃ navadvāraṃ ekapālaṃ trikoṣṭhakam |
ṣaṭkulaṃ pañcavipaṇaṃ pañcaprakṛti strīdhavam || 56 ||
[Analyze grammar]

pañcendriyārthā ārāmā dvāraḥ prāṇā nava prabho |
tejo'bannāni koṣṭhāni kulamindriyasaṅgrahaḥ || 57 ||
[Analyze grammar]

vipaṇastu kriyāśaktiḥ bhūtaprakṛtiravyayā |
śaktyadhīśaḥ pumāṃstvatra praviṣṭo nāvabudhyate || 58 ||
[Analyze grammar]

tasmiṃstvaṃ rāmayā spṛṣṭo ramamāṇo'śrutasmṛtiḥ |
tatsaṅgādīdṛśīṃ prāpto daśāṃ pāpīyasīṃ prabho || 59 ||
[Analyze grammar]

na tvaṃ vidarbhaduhitā nāyaṃ vīraḥ suhṛttava |
na patistvaṃ purañjanyā ruddho navamukhe yayā || 60 ||
[Analyze grammar]

māyā hyeṣā mayā sṛṣṭā yatpumāṃsaṃ striyaṃ satīm |
manyase nobhayaṃ yadvai haṃsau paśyāvayorgatim || 61 ||
[Analyze grammar]

ahaṃ bhavānna cānyastvaṃ tvamevāhaṃ vicakṣva bhoḥ |
na nau paśyanti kavayaḥ chidraṃ jātu manāgapi || 62 ||
[Analyze grammar]

yathā puruṣa ātmānaṃ ekaṃ ādarśacakṣuṣoḥ |
dvidhābhūtamavekṣeta tathaivāntaramāvayoḥ || 63 ||
[Analyze grammar]

evaṃ sa mānaso haṃso haṃsena pratibodhitaḥ |
svasthastadvyabhicāreṇa naṣṭāmāpa punaḥ smṛtim || 64 ||
[Analyze grammar]

barhiṣmannetadadhyātmaṃ pārokṣyeṇa pradarśitam |
yatparokṣapriyo devo bhagavānviśvabhāvanaḥ || 65 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe puraṃjanopākhyāne aṣṭāviṃśo'dhyāyaḥ || 28 ||
[Analyze grammar]