Chapter 6

[English text for this chapter is available]

maitreya uvāca |
atha devagaṇāḥ sarve rudrānīkaiḥ parājitāḥ |
śūlapaṭṭiśanistriṃśa gadāparighamud‍garaiḥ || 1 ||
[Analyze grammar]

sañchinnabhinnasarvāṅgāḥ sartviksabhyā bhayākulāḥ |
svayambhuve namaskṛtya kārtsnyenaitan nyavedayan || 2 ||
[Analyze grammar]

upalabhya puraivaitad bhagavān abjasambhavaḥ |
nārāyaṇaśca viśvātmā na kasyādhvaramīyatuḥ || 3 ||
[Analyze grammar]

tadākarṇya vibhuḥ prāha tejīyasi kṛtāgasi |
kṣemāya tatra sā bhūyāt nanna prāyeṇa bubhūṣatām || 4 ||
[Analyze grammar]

athāpi yūyaṃ kṛtakilbiṣā bhavaṃ |
ye barhiṣo bhāgabhājaṃ parāduḥ |
prasādayadhvaṃ pariśuddhacetasā |
kṣipraprasādaṃ pragṛhītāṅghripadmam || 5 ||
[Analyze grammar]

āśāsānā jīvitamadhvarasya |
lokaḥ sapālaḥ kupite na yasmin |
tamāśu devaṃ priyayā vihīnaṃ |
kṣamāpayadhvaṃ hṛdi viddhaṃ duruktaiḥ || 6 ||
[Analyze grammar]

nāhaṃ na yajño na ca yūyamanye |
ye dehabhājo munayaśca tattvam |
viduḥ pramāṇaṃ balavīryayorvā |
yasyātmatantrasya ka upāyaṃ vidhitset || 7 ||
[Analyze grammar]

sa itthamādiśya surānajastaiḥ |
samanvitaḥ pitṛbhiḥ saprajeśaiḥ |
yayau svadhiṣṇyānnilayaṃ puradviṣaḥ |
kailāsamadripravaraṃ priyaṃ prabhoḥ || 8 ||
[Analyze grammar]

janmauṣadhitapomantra yogasiddhairnaretaraiḥ |
juṣṭaṃ kinnaragandharvaiḥ apsarobhirvṛtaṃ sadā || 9 ||
[Analyze grammar]

nānāmaṇimayaiḥ śṛṅgaiḥ nānādhātuvicitritaiḥ |
nānādrumalatāgulmaiḥ nānāmṛgagaṇāvṛtaiḥ || 10 ||
[Analyze grammar]

nānāmalaprasravaṇaiḥ nānākandarasānubhiḥ |
ramaṇaṃ viharantīnāṃ ramaṇaiḥ siddhayoṣitām || 11 ||
[Analyze grammar]

mayūrakekābhirutaṃ madāndhālivimūrcchitam |
plāvitai raktakaṇṭhānāṃ kūjitaiśca patattriṇām || 12 ||
[Analyze grammar]

āhvayantaṃ ivoddhastaiḥ dvijān kāmadughairdrumaiḥ |
vrajantamiva mātaṅgaiḥ gṛṇantamiva nirjharaiḥ || 13 ||
[Analyze grammar]

mandāraiḥ pārijātaiśca saralaiścopaśobhitam |
tamālaiḥ śālatālaiśca kovidārāsanārjunaiḥ || 14 ||
[Analyze grammar]

cūtaiḥ kadambairnīpaiśca nāgapunnāga campakaiḥ |
pāṭalāśokabakulaiḥ kundaiḥ kurabakairapi || 15 ||
[Analyze grammar]

svarṇārṇaśatapatraiśca varareṇukajātibhiḥ |
kubjakairmallikābhiśca mādhavībhiśca maṇḍitam || 16 ||
[Analyze grammar]

panasodumbarāśvattha plakṣa nyagrodhahiṅgubhiḥ |
bhūrjairoṣadhibhiḥ pūgai rājapūgaiśca jambubhiḥ || 17 ||
[Analyze grammar]

kharjūrāmrātakāmrādyaiḥ priyāla madhukeṅgudaiḥ |
drumajātibhiranyaiśca rājitaṃ veṇukīcakaiḥ || 18 ||
[Analyze grammar]

kumudotpalakahlāra śatapatravanarddhibhiḥ |
nalinīṣu kalaṃ kūjat khagavṛndopaśobhitam || 19 ||
[Analyze grammar]

mṛgaiḥ śākhāmṛgaiḥ kroḍaiḥ mṛgendraiḥ ṛkṣaśalyakaiḥ |
gavayaiḥ śarabhairvyāghrai rurubhirmahiṣādibhiḥ || 20 ||
[Analyze grammar]

karṇāntraikapadāśvāsyaiḥ nirjuṣṭaṃ vṛkanābhibhiḥ |
kadalīkhaṇḍasaṃruddha nalinīpulinaśriyam || 21 ||
[Analyze grammar]

paryastaṃ nandayā satyāḥ snānapuṇyatarodayā |
vilokya bhūteśagiriṃ vibudhā vismayaṃ yayuḥ || 22 ||
[Analyze grammar]

dadṛśustatra te ramyāṃ alakāṃ nāma vai purīm |
vanaṃ saugandhikaṃ cāpi yatra tannāma paṅkajam || 23 ||
[Analyze grammar]

nandā ca alakanandā ca saritau bāhyataḥ puraḥ |
tīrthapādapadāmbhoja rajasātīva pāvane || 24 ||
[Analyze grammar]

yayoḥ surastriyaḥ kṣattaḥ avaruhya svadhiṣṇyataḥ |
krīḍanti puṃsaḥ siñcantyo vigāhya ratikarśitāḥ || 25 ||
[Analyze grammar]

yayoḥ tatsnānavibhraṣṭa navakuṅkumapiñjaram |
vitṛṣo'pi pibantyambhaḥ pāyayanto gajā gajīḥ || 2 ||
[Analyze grammar]

tārahema mahārat‍na vimānaśatasaṅkulām |
juṣṭāṃ puṇyajanastrībhiḥ yathā khaṃ sataḍid‍ghanam || 27 ||
[Analyze grammar]

hitvā yakṣeśvarapurīṃ vanaṃ saugandhikaṃ ca tat |
drumaiḥ kāmadughairhṛdyaṃ citramālyaphalacchadaiḥ || 28 ||
[Analyze grammar]

raktakaṇṭhakhagānīka svaramaṇḍitaṣaṭpadam |
kalahaṃsakulapreṣṭhaṃ kharadaṇḍajalāśayam || 29 ||
[Analyze grammar]

vanakuñjara saṅghṛṣṭa haricandanavāyunā |
adhi puṇyajanastrīṇāṃ muhurunmathayanmanaḥ || 30 ||
[Analyze grammar]

vaidūryakṛtasopānā vāpya utpalamālinīḥ |
prāptaṃ kimpuruṣairdṛṣṭvā te ārād dadṛśurvaṭam || 31 ||
[Analyze grammar]

sa yojanaśatotsedhaḥ pādonaviṭapāyataḥ |
paryakkṛtācalacchāyo nirnīḍastāpavarjitaḥ || 32 ||
[Analyze grammar]

tasmin mahāyogamaye mumukṣuśaraṇe surāḥ |
dadṛśuḥ śivamāsīnaṃ tyaktāmarṣamivāntakam || 33 ||
[Analyze grammar]

sanandanādyairmahāsiddhaiḥ śāntaiḥ saṃśāntavigraham |
upāsyamānaṃ sakhyā ca bhartrā guhyakarakṣasām || 34 ||
[Analyze grammar]

vidyātapoyogapathaṃ āsthitaṃ tamadhīśvaram |
carantaṃ viśvasuhṛdaṃ vātsalyāt lokamaṅgalam || 35 ||
[Analyze grammar]

liṅgaṃ ca tāpasābhīṣṭaṃ bhasmadaṇḍajaṭājinam |
aṅgena sandhyābhrarucā candralekhāṃ ca bibhratam || 36 ||
[Analyze grammar]

upaviṣṭaṃ darbhamayyāṃ bṛsyāṃ brahma sanātanam |
nāradāya pravocantaṃ pṛcchate śṛṇvatāṃ satām || 37 ||
[Analyze grammar]

kṛtvorau dakṣiṇe savyaṃ pādapadmaṃ ca jānuni |
bāhuṃ prakoṣṭhe'kṣamālāṃ āsīnaṃ tarkamudrayā || 38 ||
[Analyze grammar]

taṃ brahmanirvāṇasamādhimāśritaṃ |
vyupāśritaṃ giriśaṃ yogakakṣām |
salokapālā munayo manūnāṃ |
ādyaṃ manuṃ prāñjalayaḥ praṇemuḥ || 39 ||
[Analyze grammar]

sa tūpalabhyāgatamātmayoniṃ |
surāsureśairabhivanditāṅghriḥ |
utthāya cakre śirasābhivandana |
marhattamaḥ kasya yathaiva viṣṇuḥ || 40 ||
[Analyze grammar]

tathāpare siddhagaṇā maharṣibhiḥ |
ye vai samantādanu nīlalohitam |
namaskṛtaḥ prāha śaśāṅkaśekharaṃ |
kṛtapraṇāmaṃ prahasannivātmabhūḥ || 41 ||
[Analyze grammar]

brahmovāca |
jāne tvāmīśaṃ viśvasya jagato yonibījayoḥ |
śakteḥ śivasya ca paraṃ yattad‍brahmā nirantaram || 42 ||
[Analyze grammar]

tvameva bhagavan etat śivaśaktyoḥ svarūpayoḥ |
viśvaṃ sṛjasi pāsyatsi krīḍan ūrṇapaṭo yathā || 43 ||
[Analyze grammar]

tvameva dharmārthadughābhipattaye |
dakṣeṇa sūtreṇa sasarjithādhvaram |
tvayaiva loke'vasitāśca setavo |
yānbrāhmaṇāḥ śraddadhate dhṛtavratāḥ || 44 ||
[Analyze grammar]

tvaṃ karmaṇāṃ maṅgala maṅgalānāṃ |
kartuḥ svalokaṃ tanuṣe svaḥ paraṃ vā |
amaṅgalānāṃ ca tamisramulbaṇaṃ |
viparyayaḥ kena tadeva kasyacit || 45 ||
[Analyze grammar]

na vai satāṃ tvat caraṇārpitātmanāṃ |
bhūteṣu sarveṣvabhipaśyatāṃ tava |
bhūtāni cātmanyapṛthagdidṛkṣatāṃ |
prāyeṇa roṣo'bhibhavedyathā paśum || 46 ||
[Analyze grammar]

pṛthagdhiyaḥ karmadṛśo durāśayāḥ |
parodayenārpitahṛdrujo'niśam |
parān duruktairvitudantyaruntudāḥ |
tānmāvadhīd daivavadhān bhavadvidhaḥ || 47 ||
[Analyze grammar]

yasminyadā puṣkaranābhamāyayā |
durantayā spṛṣṭadhiyaḥ pṛthagdṛśaḥ |
kurvanti tatra hyanukampayā kṛpāṃ |
na sādhavo daivabalātkṛte kramam || 48 ||
[Analyze grammar]

bhavāṃstu puṃsaḥ paramasya māyayā |
durantayāspṛṣṭamatiḥ samastadṛk |
tayā hatātmasvanukarmacetaḥ |
svanugrahaṃ kartumihārhasi prabho || 49 ||
[Analyze grammar]

kurvadhvarasyoddharaṇaṃ hatasya bhoḥ |
tvayāsamāptasya mano prajāpateḥ |
na yatra bhāgaṃ tava bhāgino daduḥ |
kuyājino yena makho ninīyate || 50 ||
[Analyze grammar]

jīvatād yajamāno'yaṃ prapadyetākṣiṇī bhagaḥ |
bhṛgoḥ śmaśrūṇi rohantu pūṣṇo dantāśca pūrvavat || 51 ||
[Analyze grammar]

devānāṃ bhagnagātrāṇāṃ ṛtvijāṃ cāyudhāśmabhiḥ |
bhavatānugṛhītānāṃ āśu manyo'stvanāturam || 52 ||
[Analyze grammar]

eṣa te rudra bhāgo'stu yaducchiṣṭo'dhvarasya vai |
yajñaste rudra bhāgena kalpatāṃ adya yajñahan || 53 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe rudrasāntvanaṃ nāma ṣaṣṭho'dhyāyaḥ || 6 ||
[Analyze grammar]