Chapter 4

[English text for this chapter is available]

maitreya uvāca |
etāvaduktvā virarāma śaṅkaraḥ |
pat‍nyaṅganāśaṃ hyubhayatra cintayan |
suhṛd didṛkṣuḥ pariśaṅkitā bhavān |
niṣkrāmatī nirviśatī dvidhā'sa sā || 1 ||
[Analyze grammar]

suhṛd didṛkṣāpratighātadurmanāḥ |
snehādrudatyaśrukalātivihvalā |
bhavaṃ bhavānyapratipūruṣaṃ ruṣā |
pradhakṣyatīvaikṣata jātavepathuḥ || 2 ||
[Analyze grammar]

tato viniḥśvasya satī vihāya taṃ |
śokena roṣeṇa ca dūyatā hṛdā |
pitroragāt straiṇavimūḍhadhīrgṛhān |
premṇātmano yo'rdhamadātsatāṃ priyaḥ || 3 ||
[Analyze grammar]

tāmanvagacchan drutavikramāṃ satīṃ |
ekāṃ trinetrānucarāḥ sahasraśaḥ |
sapārṣadayakṣā maṇimanmadādayaḥ |
purovṛṣendrāstarasā gatavyathāḥ || 4 ||
[Analyze grammar]

tāṃ sārikā kandukadarpaṇāmbuja |
śvetātapatra vyajanasragādibhiḥ |
gītāyanaiḥ dundubhiśaṅkhaveṇubhiḥ |
vṛṣendramāropya viṭaṅkitā yayuḥ || 5 ||
[Analyze grammar]

ābrahmaghoṣorjitayajñavaiśasaṃ |
viprarṣijuṣṭaṃ vibudhaiśca sarvaśaḥ |
mṛddārvayaḥkāñcanadarbhacarmabhiḥ |
nisṛṣṭabhāṇḍaṃ yajanaṃ samāviśat || 6 ||
[Analyze grammar]

tāmāgatāṃ tatra na kaścanādriyad |
vimānitāṃ yajñakṛto bhayājjanaḥ |
ṛte svasṝrvai jananīṃ ca sādarāḥ |
premāśrukaṇṭhyaḥ pariṣasvajurmudā || 7 ||
[Analyze grammar]

saudaryasampraśnasamarthavārtayā |
mātrā ca mātṛṣvasṛbhiśca sādaram |
dattāṃ saparyāṃ varamāsanaṃ ca sā |
nādatta pitrāpratinanditā satī || 8 ||
[Analyze grammar]

arudrabhāgaṃ tamavekṣya cādhvaraṃ |
pitrā ca deve kṛtahelanaṃ vibhau |
anādṛtā yajñasadasyadhīśvarī |
cukopa lokāniva dhakṣyatī ruṣā || 9 ||
[Analyze grammar]

jagarha sāmarṣavipannayā girā |
śivadviṣaṃ dhūmapathaśramasmayam |
svatejasā bhūtagaṇān samutthitān |
nigṛhya devī jagato'bhiśṛṇvataḥ || 10 ||
[Analyze grammar]

devyuvāca |
na yasya loke'styatiśāyanaḥ priyaḥ |
tathāpriyo dehabhṛtāṃ priyātmanaḥ |
tasmin samastātmani muktavairake |
ṛte bhavantaṃ katamaḥ pratīpayet || 11 ||
[Analyze grammar]

doṣān pareṣāṃ hi guṇeṣu sādhavo |
gṛhṇanti kecinna bhavādṛśo dvija |
guṇāṃśca phalgūn bahulīkariṣṇavo |
mahattamāsteṣvavidad‍bhavānagham || 12 ||
[Analyze grammar]

nāścaryametadyadasatsu sarvadā |
mahadvinindā kuṇapātmavādiṣu |
serṣyaṃ mahāpūruṣapādapāṃsubhiḥ |
nirastatejaḥsu tadeva śobhanam || 13 ||
[Analyze grammar]

yad dvyakṣaraṃ nāma gireritaṃ nṛṇāṃ |
sakṛtprasaṅgādaghamāśu hanti tat |
pavitrakīrtiṃ tamalaṅghyaśāsanaṃ |
bhavānaho dveṣṭi śivaṃ śivetaraḥ || 14 ||
[Analyze grammar]

yatpādapadmaṃ mahatāṃ mano'libhiḥ |
niṣevitaṃ brahmarasāsavārthibhiḥ |
lokasya yadvarṣati cāśiṣo'rthinaḥ |
tasmai bhavān druhyati viśvabandhave || 15 ||
[Analyze grammar]

kiṃ vā śivākhyamaśivaṃ na vidustvadanye |
brahmādayastamavakīrya jaṭāḥ śmaśāne |
tanmālyabhasmanṛkapālyavasatpiśācaiḥ |
ye mūrdhabhirdadhati taccaraṇāvasṛṣṭam || 16 ||
[Analyze grammar]

karṇau pidhāya nirayādyadakalpa īśe |
dharmāvitaryasṛṇibhirnṛbhirasyamāne |
chindyātprasahya ruśatīmasatīṃ prabhuścet |
jihvāmasūnapi tato visṛjetsa dharmaḥ || 17 ||
[Analyze grammar]

atastavotpannamidaṃ kalevaraṃ |
na dhārayiṣye śitikaṇṭhagarhiṇaḥ |
jagdhasya mohāddhi viśuddhimandhaso |
jugupsitasyoddharaṇaṃ pracakṣate || 18 ||
[Analyze grammar]

na vedavādān anuvartate matiḥ |
sva eva loke ramato mahāmuneḥ |
yathā gatirdevamanuṣyayoḥ pṛthak |
sva eva dharme na paraṃ kṣipetsthitaḥ || 19 ||
[Analyze grammar]

karma pravṛttaṃ ca nivṛttamapyṛtaṃ |
vede vivicyobhayaliṅgamāśritam |
virodhi tadyaugapadaikakartari |
dvayaṃ tathā brahmaṇi karma narcchati || 20 ||
[Analyze grammar]

mā vaḥ padavyaḥ pitarasmadāsthitā |
yā yajñaśālāsu na dhūmavartmabhiḥ |
tadannatṛptairasubhṛdbhirīḍitā |
avyaktaliṅgā avadhūtasevitāḥ || 21 ||
[Analyze grammar]

naitena dehena hare kṛtāgaso |
dehod‍bhavenālamalaṃ kujanmanā |
vrīḍā mamābhūtkujanaprasaṅgataḥ |
tajjanma dhig yo mahatāmavadyakṛt || 22 ||
[Analyze grammar]

gotraṃ tvadīyaṃ bhagavānvṛṣadhvajo |
dākṣāyaṇītyāha yadā sudurmanāḥ |
vyapetanarmasmitamāśu taddhyahaṃ |
vyutsrakṣya etatkuṇapaṃ tvadaṅgajam || 23 ||
[Analyze grammar]

maitreya uvāca |
ityadhvare dakṣamanūdya śatruhan |
kṣitāvudīcīṃ niṣasāda śāntavāk |
spṛṣṭvā jalaṃ pītadukūlasaṃvṛtā |
nimīlya dṛgyogapathaṃ samāviśat || 24 ||
[Analyze grammar]

kṛtvā samānāvanilau jitāsanā |
sodānamutthāpya ca nābhicakrataḥ |
śanairhṛdi sthāpya dhiyorasi sthitaṃ |
kaṇṭhād bhruvormadhyamaninditānayat || 25 ||
[Analyze grammar]

evaṃ svadehaṃ mahatāṃ mahīyasā |
muhuḥ samāropitamaṅkamādarāt |
jihāsatī dakṣaruṣā manasvinī |
dadhāra gātreṣvanilāgnidhāraṇām || 26 ||
[Analyze grammar]

tataḥ svabhartuścaraṇāmbujāsavaṃ |
jagad‍gurościntayatī na cāparam |
dadarśa deho hatakalmaṣaḥ satī |
sadyaḥ prajajvāla samādhijāgninā || 27 ||
[Analyze grammar]

tatpaśyatāṃ khe bhuvi cād‍bhutaṃ mahat |
hā heti vādaḥ sumahān ajāyata |
hanta priyā daivatamasya devī |
jahāvasūnkena satī prakopitā || 28 ||
[Analyze grammar]

aho anātmyaṃ mahadasya paśyata |
prajāpateryasya carācaraṃ prajāḥ |
jahāvasūnyadvimatā'tmajā |
satī manasvinī mānamabhīkṣṇamarhati || 29 ||
[Analyze grammar]

so'yaṃ durmarṣahṛdayo brahmadhruk ca |
loke'pakīrtiṃ mahatīmavāpsyati |
yadaṅgajāṃ svāṃ puruṣadviḍudyatāṃ |
na pratyaṣedhanmṛtaye'parādhataḥ || 30 ||
[Analyze grammar]

vadatyevaṃ jane satyā dṛṣṭvāsutyāgamad‍bhutam |
dakṣaṃ tatpārṣadā hantuṃ udatiṣṭhannudāyudhāḥ || 31 ||
[Analyze grammar]

teṣāṃ āpatatāṃ vegaṃ niśāmya bhagavān bhṛguḥ |
yajñaghnaghnena yajuṣā dakṣiṇāgnau juhāva ha || 32 ||
[Analyze grammar]

adhvaryuṇā hūyamāne devā utpeturojasā |
ṛbhavo nāma tapasā somaṃ prāptāḥ sahasraśaḥ || 33 ||
[Analyze grammar]

tairalātāyudhaiḥ sarve pramathāḥ sahaguhyakāḥ |
hanyamānā diśo bhejuḥ uśadbhirbrahmatejasā || 34 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe satīdehotsargo nāma caturtho'dhyāyaḥ || 4 ||
[Analyze grammar]