Chapter 6

[English text for this chapter is available]

ṛṣiruvāca |
iti tāsāṃ svaśaktīnāṃ satīnāmasametya saḥ |
prasuptalokatantrāṇāṃ niśāmya gatimīśvaraḥ || 1 ||
[Analyze grammar]

kālasañjñāṃ tadā devīṃ bibhrat śaktimurukramaḥ |
trayoviṃśati tattvānāṃ gaṇaṃ yugapadāviśat || 2 ||
[Analyze grammar]

so'nupraviṣṭo bhagavān ceṣṭārūpeṇa taṃ gaṇam |
bhinnaṃ saṃyojayāmāsa suptaṃ karma prabodhayan || 3 ||
[Analyze grammar]

prabuddhakarma daivena trayoviṃśatiko gaṇaḥ |
prerito'janayatsvābhiḥ mātrābhiḥ adhipūruṣam || 4 ||
[Analyze grammar]

pareṇa viśatā svasmin mātrayā viśvasṛggaṇaḥ |
cukṣobhānyonyamāsādya yasmin lokāścarācarāḥ || 5 ||
[Analyze grammar]

hiraṇmayaḥ sa puruṣaḥ sahasraparivatsarān |
āṇḍakośa uvāsāpsu sarvasattvopabṛṃhitaḥ || 6 ||
[Analyze grammar]

sa vai viśvasṛjāṃ garbho devakarmātmaśaktimān |
vibabhājātmanātmānaṃ ekadhā daśadhā tridhā || 7 ||
[Analyze grammar]

eṣa hyaśeṣasattvānāṃ ātmāṃśaḥ paramātmanaḥ |
ādyo'vatāro yatrāsau bhūtagrāmo vibhāvyate || 8 ||
[Analyze grammar]

sādhyātmaḥ sādhidaivaśca sādhibhūta iti tridhā |
virāṭprāṇo daśavidha ekadhā hṛdayena ca || 9 ||
[Analyze grammar]

smaranviśvasṛjāmīśo vijñāpitaṃ adhokṣajaḥ |
virājaṃ atapatsvena tejasaiṣāṃ vivṛttaye || 10 ||
[Analyze grammar]

atha tasyābhitaptasya kati cāyatanāni ha |
nirabhidyanta devānāṃ tāni me gadataḥ śrṛṇu || 11 ||
[Analyze grammar]

tasyāgnirāsyaṃ nirbhinnaṃ lokapālo'viśatpadam |
vācā svāṃśena vaktavyaṃ yayāsau pratipadyate || 12 ||
[Analyze grammar]

nirbhinnaṃ tālu varuṇo lokapālo'viśaddhareḥ |
jihvayāṃśena ca rasaṃ yayāsau pratipadyate || 13 ||
[Analyze grammar]

nirbhinne aśvinau nāse viṣṇoḥ āviśatāṃ padam |
ghrāṇenāṃśena gandhasya pratipattiryato bhavet || 14 ||
[Analyze grammar]

nirbhinne akṣiṇī tvaṣṭā lokapālo'viśadvibhoḥ |
cakṣuṣāṃśena rūpāṇāṃ pratipattiryato bhavet || 15 ||
[Analyze grammar]

nirbhinnānyasya carmāṇi lokapālo'nilo'viśat |
prāṇenāṃśena saṃsparśaṃ yenāsau pratipadyate || 16 ||
[Analyze grammar]

karṇau asya vinirbhinnau dhiṣṇyaṃ svaṃ viviśurdiśaḥ |
śrotreṇāṃśena śabdasya siddhiṃ yena prapadyate || 17 ||
[Analyze grammar]

tvacamasya vinirbhinnāṃ viviśurdhiṣṇyamoṣadhīḥ |
aṃśena romabhiḥ kaṇḍūṃ yairasau pratipadyate || 18 ||
[Analyze grammar]

meḍhraṃ tasya vinirbhinnaṃ svadhiṣṇyaṃ ka upāviśat |
retasāṃśena yenāsau ānandaṃ pratipadyate || 19 ||
[Analyze grammar]

gudaṃ puṃso vinirbhinnaṃ mitro lokeśa āviśat |
pāyunāṃśena yenāsau visargaṃ pratipadyate || 20 ||
[Analyze grammar]

hastāvasya vinirbhinnau indraḥ svarpatirāviśat |
vārtayāṃśena puruṣo yayā vṛttiṃ prapadyate || 21 ||
[Analyze grammar]

pādau asya vinirbhinnau lokeśo viṣṇurāviśat |
gatyā svāṃśena puruṣo yayā prāpyaṃ prapadyate || 22 ||
[Analyze grammar]

buddhiṃ cāsya vinirbhinnāṃ vāgīśo dhiṣṇyamāviśat |
bodhenāṃśena boddhavya pratipattiryato bhavet || 23 ||
[Analyze grammar]

hṛdayaṃ cāsya nirbhinnaṃ candramā dhiṣṇyamāviśat |
manasāṃśena yenāsau vikriyāṃ pratipadyate || 24 ||
[Analyze grammar]

ātmānaṃ cāsya nirbhinnaṃ abhimāno'viśatpadam |
karmaṇāṃśena yenāsau kartavyaṃ pratipadyate || 25 ||
[Analyze grammar]

sattvaṃ cāsya vinirbhinnaṃ mahān dhiṣṇyamupāviśat |
cittenāṃśena yenāsau vijñānaṃ pratipadyate || 26 ||
[Analyze grammar]

śīrṣṇo'sya dyaurdharā pad‍bhyāṃ khaṃ nābherudapadyata |
guṇānāṃ vṛttayo yeṣu pratīyante surādayaḥ || 27 ||
[Analyze grammar]

ātyantikena sattvena divaṃ devāḥ prapedire |
dharāṃ rajaḥsvabhāvena paṇayo ye ca tānanu || 28 ||
[Analyze grammar]

tārtīyena svabhāvena bhagavan nābhimāśritāḥ |
ubhayorantaraṃ vyoma ye rudrapārṣadāṃ gaṇāḥ || 29 ||
[Analyze grammar]

mukhato'vartata brahma puruṣasya kurūdvaha |
yastūnmukhatvād varṇānāṃ mukhyo'bhūd brāhmaṇo guruḥ || 30 ||
[Analyze grammar]

bāhubhyo'vartata kṣatraṃ kṣatriyastadanuvrataḥ |
yo jātastrāyate varṇān pauruṣaḥ kaṇṭakakṣatāt || 31 ||
[Analyze grammar]

viśo'vartanta tasyorvoḥ lokavṛttikarīrvibhoḥ |
vaiśyastadud‍bhavo vārtāṃ nṛṇāṃ yaḥ samavartayat || 32 ||
[Analyze grammar]

pad‍bhyāṃ bhagavato jajñe śuśrūṣā dharmasiddhaye |
tasyāṃ jātaḥ purā śūdro yadvṛttyā tuṣyate hariḥ || 33 ||
[Analyze grammar]

ete varṇāḥ svadharmeṇa yajanti svaguruṃ harim |
śraddhayā ātmaviśuddhyarthaṃ yajjātāḥ saha vṛttibhiḥ || 34 ||
[Analyze grammar]

etat kṣattarbhagavato daivakarmātmarūpiṇaḥ |
kaḥ śraddadhyādupākartuṃ yogamāyābalodayam || 35 ||
[Analyze grammar]

tathāpi kīrtayāmyaṅga yathāmati yathāśrutam |
kīrtiṃ hareḥ svāṃ satkartuṃ giramanyābhidhāsatīm || 36 ||
[Analyze grammar]

ekāntalābhaṃ vacaso nu puṃsāṃ |
suślokamaulerguṇavādamāhuḥ |
śruteśca vidvadbhirupākṛtāyāṃ |
kathāsudhāyāṃ upasamprayogam || 37 ||
[Analyze grammar]

ātmano'vasito vatsa mahimā kavinā'dinā |
saṃvatsarasahasrānte dhiyā yogavipakvayā || 38 ||
[Analyze grammar]

ato bhagavato māyā māyināmapi mohinī |
yatsvayaṃ cātmavartmātmā na veda kimutāpare || 39 ||
[Analyze grammar]

yato'prāpya nyavartanta vācaśca manasā saha |
ahaṃ cānya ime devāḥ tasmai bhagavate namaḥ || 40 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe ṣaṣṭho'dhyāyaḥ || 6 ||
[Analyze grammar]