Chapter 8

[English text for this chapter is available]

rājovāca |
brahmaṇā codito brahman guṇākhyāne'guṇasya ca |
yasmai yasmai yathā prāha nārado devadarśanaḥ || 1 ||
[Analyze grammar]

etat veditumicchāmi tattvaṃ tattvavidāṃ vara |
harerad‍bhutavīryasya kathā lokasumaṅgalāḥ || 2 ||
[Analyze grammar]

kathayasva mahābhāga yathā'haṃ akhilātmani |
kṛṣṇe niveśya niḥsaṅgaṃ manastyakṣye kalevaram || 3 ||
[Analyze grammar]

śṛṇvataḥ śraddhayā nityaṃ gṛṇataśca svaceṣṭitam |
kālena nātidīrgheṇa bhagavānviśate hṛdi || 4 ||
[Analyze grammar]

praviṣṭaḥ karṇarandhreṇa svānāṃ bhāvasaroruham |
dhunoti śamalaṃ kṛṣṇaḥ salilasya yathā śarat || 5 ||
[Analyze grammar]

dhautātmā puruṣaḥ kṛṣṇa pādamūlaṃ na muñcati |
muktasarvaparikleśaḥ pānthaḥ svaśaraṇaṃ yathā || 6 ||
[Analyze grammar]

yadadhātumato brahmandehārambho'sya dhātubhiḥ |
yadṛcchayā hetunā vā bhavanto jānate yathā || 7 ||
[Analyze grammar]

āsīd yadudarātpadmaṃ lokasaṃsthānalakṣaṇam |
yāvānayaṃ vai puruṣa iyattāvayavaiḥ pṛthak |
tāvānasāviti proktaḥ saṃsthāvayavavāniva || 8 ||
[Analyze grammar]

ajaḥ sṛjati bhūtāni bhūtātmā yadanugrahāt |
dadṛśe yena tad rūpaṃ nābhipadmasamud‍bhavaḥ || 9 ||
[Analyze grammar]

sa cā'pi yatra puruṣo viśvasthityud‍bhavāpyayaḥ |
muktvā'tmamāyāṃ māyeśaḥ śete sarvaguhāśayaḥ || 10 ||
[Analyze grammar]

puruṣāvayavairlokāḥ sapālāḥ pūrvakalpitāḥ |
lokairamuṣyāvayavāḥ sapālairiti śuśruma || 11 ||
[Analyze grammar]

yāvān kalpo vikalpo vā yathā kālo'numīyate |
bhūtabhavyabhavacchabda āyurmānaśca yat sataḥ || 12 ||
[Analyze grammar]

kālasyānugatiryā tu lakṣyate'ṇvī bṛhatyapi |
yāvatyaḥ karmagatayo yādṛśī dvijasattama || 13 ||
[Analyze grammar]

yasmin karmasamāvāyo yathā yenopagṛhyate |
guṇānāṃ guṇināścaiva pariṇāmamabhīpsatām || 14 ||
[Analyze grammar]

bhūpātālakakubvyoma grahanakṣatrabhūbhṛtām |
saritsamudradvīpānāṃ sambhavaścaitadokasām || 15 ||
[Analyze grammar]

pramāṇamaṇḍakośasya bāhyābhyantarabhedataḥ |
mahatāṃ cānucaritaṃ varṇāśramaviniścayaḥ || 16 ||
[Analyze grammar]

yugāni yugamānaśca dharmo yaśca yuge yuge |
avatārānucaritaṃ yadāścaryatamaṃ hareḥ || 17 ||
[Analyze grammar]

nṛṇāṃ sādhāraṇo dharmaḥ saviśeṣaśca yādṛśaḥ |
śreṇīnāṃ rājarṣīṇāñca dharmaḥ kṛcchreṣu jīvatām || 18 ||
[Analyze grammar]

tattvānāṃ parisaṅkhyānaṃ lakṣaṇaṃ hetulakṣaṇam |
puruṣārādhanavidhiḥ yogasyādhyātmikasya ca || 19 ||
[Analyze grammar]

yogeśvaraiśvaryagatiḥ liṅgabhaṅgastu yoginām |
vedopavedadharmāṇāṃ itihāsapurāṇayoḥ || 20 ||
[Analyze grammar]

samplavaḥ sarvabhūtānāṃ vikramaḥ pratisaṅkramaḥ |
iṣṭāpūrtasya kāmyānāṃ trivargasya ca yo vidhiḥ || 21 ||
[Analyze grammar]

yaścānuśāyināṃ sargaḥ pāṣaṇḍasya ca sambhavaḥ |
ātmano bandhamokṣau ca vyavasthānaṃ svarūpataḥ || 22 ||
[Analyze grammar]

yathātmatantro bhagavān vikrīḍatyātmamāyayā |
visṛjya vā yathā māyāṃ udāste sākṣivadvibhuḥ || 23 ||
[Analyze grammar]

sarvametacca bhagavan pṛcchato me'nupūrvaśaḥ |
tattvato'rhasyudāhartuṃ prapannāya mahāmune || 24 ||
[Analyze grammar]

atra pramāṇaṃ hi bhavān parameṣṭhī yathātmabhūḥ |
apare cānutiṣṭhanti pūrveṣāṃ pūrvajaiḥ kṛtam || 25 ||
[Analyze grammar]

na me'savaḥ parāyanti brahman anaśanādamī |
pibato'cyutapīyūṣaṃ anyatra kupitād dvijāt || 26 ||
[Analyze grammar]

śrīsūta uvāca |
sa upāmantrito rājñā kathāyāmiti satpateḥ |
brahmarāto bhṛśaṃ prīto viṣṇurātena saṃsadi || 27 ||
[Analyze grammar]

prāha bhāgavataṃ nāma purāṇaṃ brahmasammitam |
brahmaṇe bhagavatproktaṃ brahmakalpa upāgate || 28 ||
[Analyze grammar]

yadyat parīkṣidṛṣabhaḥ pāṇḍūnāmanupṛcchati |
ānupūrvyeṇa tatsarvaṃ ākhyātumupacakrame || 29 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
dvitīyaskaṃdhe aṣṭamo'dhyāyaḥ || 8 ||
[Analyze grammar]