Chapter 4

[English text for this chapter is available]

sūta uvāca |
vaiyāsakeriti vacaḥ tattvaniścayamātmanaḥ |
upadhārya matiṃ kṛṣṇe auttareyaḥ satīṃ vyadhāt || 1 ||
[Analyze grammar]

ātmajāyāsutāgāra paśudraviṇabandhuṣu |
rājye cāvikale nityaṃ virūḍhāṃ mamatāṃ jahau || 2 ||
[Analyze grammar]

papraccha cemamevārthaṃ yanmāṃ pṛcchatha sattamāḥ |
kṛṣṇānubhāvaśravaṇe śraddadhāno mahāmanāḥ || 3 ||
[Analyze grammar]

saṃsthāṃ vijñāya sannyasya karma traivargikaṃ ca yat |
vāsudeve bhagavati ātmabhāvaṃ dṛḍhaṃ gataḥ || 4 ||
[Analyze grammar]

rājovāca |
samīcīnaṃ vaco brahman sarvajñasya tavānagha |
tamo viśīryate mahyaṃ hareḥ kathayataḥ kathām || 5 ||
[Analyze grammar]

bhūya eva vivitsāmi bhagavān ātmamāyayā |
yathedaṃ sṛjate viśvaṃ durvibhāvyamadhīśvaraiḥ || 6 ||
[Analyze grammar]

yathā gopāyati vibhuḥ yathā saṃyacchate punaḥ |
yāṃ yāṃ śaktimupāśritya puruśaktiḥ paraḥ pumān |
ātmānaṃ krīḍayankrīḍan karoti vikaroti ca || 7 ||
[Analyze grammar]

nūnaṃ bhagavato brahman harerad‍bhutakarmaṇaḥ |
durvibhāvyamivābhāti kavibhiścāpi ceṣṭitam || 8 ||
[Analyze grammar]

yathā guṇāṃstu prakṛteḥ yugapat kramaśo'pi vā |
bibharti bhūriśastvekaḥ kurvan karmāṇi janmabhiḥ || 9 ||
[Analyze grammar]

vicikitsitametanme bravītu bhagavān yathā |
śābde brahmaṇi niṣṇātaḥ parasmiṃśca bhavānkhalu || 10 ||
[Analyze grammar]

sūta uvāca |
ityupāmaṃtrito rājñā guṇānukathane hareḥ |
hṛṣīkeśaṃ anusmṛtya prativaktuṃ pracakrame || 11 ||
[Analyze grammar]

śrīśuka uvāca |
namaḥ parasmai puruṣāya bhūyase |
sadud‍bhavasthānanirodhalīlayā |
gṛhītaśaktitritayāya dehināṃ |
aṃtarbhavāyānupalakṣyavartmane || 12 ||
[Analyze grammar]

bhūyo namaḥ sadvṛjinacchide'satāṃ |
asaṃbhavāyākhilasattvamūrtaye |
puṃsāṃ punaḥ pāramahaṃsya āśrame |
vyavasthitānāmanumṛgyadāśuṣe || 13 ||
[Analyze grammar]

namo namaste'stvṛṣabhāya sātvatāṃ |
vidūrakāṣṭhāya muhuḥ kuyoginām |
nirastasāmyātiśayena rādhasā |
svadhāmani brahmaṇi raṃsyate namaḥ || 14 ||
[Analyze grammar]

yatkīrtanaṃ yatsmaraṇaṃ yadīkṣaṇaṃ |
yad vaṃdanaṃ yacchravaṇaṃ yadarhaṇam |
lokasya sadyo vidhunoti kalmaṣaṃ |
tasmai subhadraśravase namo namaḥ || 15 ||
[Analyze grammar]

vicakṣaṇā yaccaraṇopasādanāt |
saṅgaṃ vyudasyobhayato'ntarātmanaḥ |
vindanti hi brahmagatiṃ gataklamāḥ |
tasmai subhadraśravase namo namaḥ || 16 ||
[Analyze grammar]

tapasvino dānaparā yaśasvino |
manasvino maṃtravidaḥ sumaṅgalāḥ |
kṣemaṃ na vindanti vinā yadarpaṇaṃ |
tasmai subhadraśravase namo namaḥ || 17 ||
[Analyze grammar]

kirātahūṇāndhrapulindapulkaśā |
ābhīrakaṅkā yavanāḥ khasādayaḥ |
ye'nye ca pāpā yadapāśrayāśrayāḥ |
śudhyanti tasmai prabhaviṣṇave namaḥ || 18 ||
[Analyze grammar]

sa eṣa ātmātmavatāmadhīśvaraḥ |
trayīmayo dharmamayastapomayaḥ |
gatavyalīkairajaśaṅkarādibhiḥ |
vitarkyaliṅgo bhagavānprasīdatām || 19 ||
[Analyze grammar]

śriyaḥ patiryajñapatiḥ prajāpatiḥ |
dhiyāṃ patirlokapatirdharāpatiḥ |
patirgatiścāndhakavṛṣṇisātvatāṃ |
prasīdatāṃ me bhagavān satāṃ patiḥ || 20 ||
[Analyze grammar]

yadaṅghryabhidhyānasamādhidhautayā |
dhiyānupaśyanti hi tattvamātmanaḥ |
vadanti caitat kavayo yathārucaṃ |
sa me mukuṃdo bhagavān prasīdatām || 21 ||
[Analyze grammar]

pracoditā yena purā sarasvatī |
vitanvatā'jasya satīṃ smṛtiṃ hṛdi |
svalakṣaṇā prādurabhūt kilāsyataḥ |
sa me ṛṣīṇāṃ ṛṣabhaḥ prasīdatām || 22 ||
[Analyze grammar]

bhūtairmahadbhirya imāḥ puro vibhuḥ |
nirmāya śete yadamūṣu pūruṣaḥ |
bhuṅkte guṇān ṣoḍaśa ṣoḍaśātmakaḥ |
so'laṅkṛṣīṣṭa bhagavān vacāṃsi me || 23 ||
[Analyze grammar]

namastasmai bhagavate vāsudevāya vedhase |
papurjñānamayaṃ saumyā yanmukhāmburuhāsavam || 24 ||
[Analyze grammar]

etad evātmabhū rājan nāradāya vipṛcchate |
vedagarbho'bhyadhāt sākṣād yadāha harirātmanaḥ || 25 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
dvitīyaskaṃdhe caturtho'dhyāyaḥ || 4 ||
[Analyze grammar]